Buyuk Britaniya va Fransiya Ukrainada o‘t ochishni to‘xtatish rejasini ishlab chiqmoqchi. Bu haqda Britaniya bosh vaziri Kir Starmerga tayanib, Deutsche Welle xabar berdi.
Starmer 2-mart kuni Londonda Ukraina bo‘yicha Yevropa sammiti boshlanishidan oldin tegishli rejani ma’lum qildi.
Biz Fransiya va, ehtimol, boshqa bir yoki ikki davlat bilan birgalikda Ukraina bilan jangovar harakatlarni to‘xtatish rejasi ustida ishlashga kelishib oldik, dedi u.
Shundan so‘ng reja Qo‘shma Shtatlar bilan muhokama qilinadi. Starmerning so‘zlariga ko‘ra, o‘t ochishni to‘xtatish rejasini ishlab chiqish to‘g‘risidagi qaror 1-mart kuni Ukraina, Fransiya va AQSH prezidentlari Vladimir Zelenskiy, Emmanuel Makron va Donald Tramp bilan muzokaralardan so‘ng qabul qilingan.
Starmer Oq uyda Zelenskiy va Tramp o‘rtasidagi mojaroga izoh berar ekan, “hech kim buni ko‘rishni xohlamaydi”, deb ta’kidladi. U aynan shu sababli voqea ishtirokchilari bilan telefonda muloqot qilganini aytdi.
Mening maqsadim ma’lum ma’noda buni yengib o‘tish va yana asosiy narsaga e’tibor qaratish, deb tushuntirdi Britaniya bosh vaziri.
Bundan tashqari, u o‘t ochish to‘xtatilgandan so‘ng Ukrainaga xavfsizlik kafolatlarini berishga tayyor bo‘lgan Yevropa davlat rahbarlarining maxsus koalitsiyasini tuzish niyatini bildirdi. The Times gazetasi muxbiri Stiven Suinford bu strategiyani, agar Amerika Qo‘shma Shtatlari Ukrainaga bunday kafolatlar berishni rad etsa, “B reja” deb atadi.
Mojaro fonidagi sammit
Ukraina bo‘yicha Londondagi sammit AQSH siyosiy yo‘nalishining so‘nggi o‘zgarishi va transatlantik alyansning kelajagi borasidagi noaniqlik kuchayib borayotgani fonida bo‘lib o‘tmoqda. Kir Starmer devonxonasi bayonotiga ko‘ra, sammitning maqsadi Ukrainada “adolatli va uzoq muddatli tinchlik”ni ta’minlashda Yevropa qo‘llab-quvvatlashini kuchaytirishdir.
Germaniya kansleri Olaf Shols ham ishtirok etayotgan Londondagi sammit ishtirokchilari AQSH tomonidan kelajakdagi qo‘llab-quvvatlashga nisbatan noaniqlik fonida mudofaa sohasidagi hamkorlikni kuchaytirish yo‘llarini ham muhokama qiladi.
Fransiya prezidenti Emmanuel Makron avvalroq Yevropaning kelajakdagi ehtimoliy yadroviy tiyib turish bo‘yicha munozaralar uchun ochiq ekanini aytgan edi. Bu masala Germaniyaning ehtimoliy yangi kansleri Fridrix Merz yaqinda London va Parij bilan shunday muzokaralar o‘tkazish tarafdori bo‘lganidan so‘ng ko‘tarildi.
Izoh (0)