Germaniyaning 13 aeroportida Ver.di xizmat ko‘rsatish sohasi xodimlari kasaba uyushmasi tomonidan xodimlarning ogohlantiruvchi bir kunlik ish tashlashlari boshlandi.
Ish tashlashlar dushanba kuni soat 00:00 da boshlanib, seshanba kuni soat 23:59 gacha davom etishi kutilmoqda.
Ish tashlashlar Berlin, Bremen, Gamburg, Gannover, Dortmund, Dyusseldorf, Myunxen, Shtutgart, Frankfurt-Mayn aeroportlarida, shuningdek Kyoln/Bonn va Leypsig/Galle aeroportlarida o‘tkazilmoqda. Dyusseldorf yaqinidagi Vetse va Karlsrue/Baden-Baden aeroportlarida esa faqat aviatsiya xavfsizligi bo‘limi xodimlari ish tashlashga qo‘shilgan.
Germaniya aeroportlari birlashmasi ADV ma’lumotlariga ko‘ra, Ver.di kasaba uyushmasi e’lon qilgan ish tashlash oqibatida 3400 dan ortiq parvoz bekor qilinishi va 510 mingga yaqin yo‘lovchining rejalari o‘zgarishi mumkin.
Kasaba uyushmasi ish haqini 8 foizga, biroq oyiga kamida 350 yevroga oshirishni, shuningdek og‘ir mehnat uchun qo‘shimcha to‘lovlarni ko‘paytirish va xodimlarga qo‘shimcha dam olish kunlari berilishini talab qilmoqda. Bayonotda ta’kidlanishicha, ish tashlash “taxminan 25 ming xodimning mehnat sharoitlarini yaxshilash” uchun zarur.
Noyabr oyida Finlyandiyaning Finnair aviakompaniyasi uchuvchilar kasaba uyushmasining ish tashlashi sababli 9 va 13-dekabr kunlari 300 ga yaqin reysni bekor qilgandi. Oktyabr oyida esa Belgiyadagi Sharlerua xalqaro aeroporti xususiy xavfsizlik kompaniyasi xodimlarining ish tashlashi sababli barcha uchib ketish reyslarini bekor qilishga majbur bo‘lgandi.
Izoh (0)