Shavkat Mirziyoyev O‘zbekiston va Germaniya hukumatlari o‘rtasida migratsiya va mobillik sohasida keng qamrovli sheriklik to‘g‘risidagi bitimni tasdiqladi.
Hujjat 2024-yil 15-sentyabr kuni Samarqandda Germaniya kansleri Olaf Sholsning tashrifi doirasida imzolangandi. Bitimga ko‘ra, Vazirlar Mahkamasi huzuridagi Migratsiya agentligi tashqi mehnat migratsiyasi qismi bo‘yicha, Ichki ishlar vazirligi esa readmissiya qismi bo‘yicha mas’ul bo‘lgan vakolatli organlar etib belgilandi.
Tashqi ishlar vazirligi O‘zbekiston tomonidan ushbu xalqaro shartnomaning kuchga kirishi uchun zarur bo‘lgan davlat ichki tartib-taomillari bajarilgani hamda uni amalga oshirish uchun mas’ul bo‘lgan vakolatli organlar to‘g‘risida Germaniya tomoniga tegishli bildirishnoma yuboradi. Vazirlar Mahkamasi hamda tegishli vazirlik va idoralarning rahbarlari ushbu xalqaro shartnoma kuchga kirgandan keyin belgilangan tartibda uning qoidalari amalga oshirilishi ustidan nazoratni ta’minlaydi.
Kambag‘allikni qisqartirish va bandlik vazirligi ma’lumotlariga ko‘ra, “Migratsiya va mobillik sohasida har tomonlama sheriklik to‘g‘risida” hukumatlararo bitim 25 ta moddadan iborat bo‘lib, tomonlar o‘rtasida quyidagi sohalarda hamkorlik o‘rnatish va rivojlantirishni ko‘zda tutadi:
- ikki davlat hududida mehnat faoliyatini amalga oshirishni maqsad qilgan malakali mutaxassislar, shu jumladan, talabalar va kasbiy ta’lim olayotgan shaxslar hamda jurnalistlar va olimlarning adolatli mobilligini rag‘batlantirish;
- mehnat faoliyatini amalga oshirish maqsadida vaqtincha migratsiyani rag‘batlantirish va soddalashtirish;
- kasbiy ta’lim va malaka oshirish sababiga ko‘ra, hamda mehnat faoliyatini amalga oshirish maqsadida davlatda uzoq muddat bo‘lishni rag‘batlantirish;
- noqonuniy migratsiya va migrantlarni noqonuniy olib kirishning oldini olish va ularga qarshi kurashish;
- mehnat ekspluatatsiyasi, majburiy mehnat va odam savdosi oldini olish va ularga qarshi kurashish hamda jabrlanuvchilarni himoya qilish.
Hujjat, shuningdek, ikki davlat hududida yashash yoki kirish shartlarini bajarmagan fuqarolarni qaytarishni soddalashtirishni ham nazarda tutadi.
2024-yil sentyabrida Germaniya Ichki ishlar va Vatan vaziri Nensi Fezer migratsiya masalasida bir qator yengilliklar ishlab chiqilayotganini ma’lum qilgandi. Bitim doirasida nemis ish beruvchilari uchun o‘zbekistonliklarni soddalashtirilgan tartibda ishga qabul qilishga tayyorligini aytgandi.
Izoh (0)