Fransiya prezidenti Emmanuel Makron telemurojaat chog‘ida Yevropadagi ittifoqchilarni fransuz yadro quroli bilan himoya qilish bo‘yicha “strategik debat” boshlanganini aytdi. Bu haqda “RBK” xabar berdi.
Men Yevropa qit’asidagi ittifoqchilarimizni yadroviy tiyib turish yordamida himoya qilish bo‘yicha strategik munozarani boshlashga qaror qildim, deya e’lon qildi Fransiya prezidenti.
Makronning ta’kidlashicha, “nima bo‘lishidan qat’i nazar, yadro qurolidan foydalanish to‘g‘risidagi qaror har doim Fransiya prezidenti qo‘lida bo‘lgan va bo‘ladi”.
Buyuk Britaniya Yevropa Ittifoqidan chiqqandan so‘ng, Fransiya yadro quroliga ega bo‘lgan yagona ittifoq mamlakati bo‘lib qoldi. Yevropa hududida Amerikaning yadroviy kallaklari joylashtirilgan, biroq Donald Tramp hokimiyatga kelganidan keyin Amerika kuchlarini Yevropadan olib chiqib ketish mumkinligi haqidagi munozaralar faollashdi.
Fransiya “yadro klubi”ning to‘qqizta davlatidan biri hisoblanadi. Stokgolm xalqaro tinchlik tadqiqotlari instituti (SIPRI) ma’lumotlariga ko‘ra, 2023-yil boshiga kelib uning arsenalida 290 ta yadroviy kallak bor edi.
2017-yilda Parij “Mudofaa va milliy xavfsizlik bo‘yicha strategik sharh”ni e’lon qildi. Unda o‘zining yadro siyosatining asosiy mohiyati belgilab berdi:
- Fransiyaning yadroviy tiyib turish siyosati faqat mudofaa xarakteriga ega;
- yadro qurolidan foydalanish “faqat qonuniy o‘zini himoya qilishning favqulodda sharoitlarida mumkin bo‘ladi”, shu sababli bu qurollar “millat xavfsizligi, himoyasi va mustaqilligining kafolati” hisoblanadi.
Makron o‘z murojaatida Ukrainadagi urushni Rossiya shartlari asosida to‘xtatishga qarshi chiqdi. U tinchlik “hech qanday narx evaziga va Rossiya hukmronligi ostida o‘rnatilishi mumkin emasligini hamda Ukrainaning taslim bo‘lishi bilan amalga oshirilmasligini” ta’kidladi.
Bundan tashqari, Fransiya rahbari Rossiya shimoliy koreyalik askarlar va Eron harbiy texnikasidan foydalanib, Ukrainadagi urushni “global mojaroga” aylantirganini aytdi.
Rossiyaning Ukrainada to‘xtashiga kim ishonadi? Rossiya allaqachon Fransiya va Yevropa uchun tahdidga aylandi, dedi Fransiya prezidenti.
Izoh (0)