Fransiya prezidenti Emmanuel Makron “armiyani kuchaytirish uchun” ko‘proq yosh ko‘ngillilarni safarbar qilish loyihasini e’lon qildi. U hukumat va harbiylarga tegishli takliflarni ishlab chiqishni topshirdi. Bu haqda Le Monde xabar berdi.
Makron Fransiyani moslashishga majbur qilayotgan “tahdidlar to‘plangani”ni ta’kidladi. U mamlakat 2030-yilga borib 210 ming nafar harbiy va 80 ming nafar zaxiradagilarga ega bo‘lishni maqsad qilganini aytdi.
U, shuningdek, “Yevropaning strategik uyg‘onishi”ga chaqirib, mudofaa ustuvorliklari bo‘yicha strategik sharhni yangilash tashabbusi bilan chiqdi.
“Keling, o‘zimizni aldamaylik. Ukrainadagi mojaro ertaga yoki indinga tugamaydi”, dedi Fransiya prezidenti.
Makron Yevropada “yevropaliklarsiz va ularning muzokaralarisiz” tinchlik va xavfsizlik bo‘lishi mumkin emasligini ta’kidladi.
“Bugungi kun oldimizda turgan vazifa - Ukrainaga bardosh berishi va kelajakdagi har qanday muzokaralarga kuchli pozitsiyadan kirib borishi uchun vositalar berishdir. Ertaga, janglar to‘xtaganidan so‘ng, vazifamiz Ukrainaga o‘z hududida urushning qayta boshlanishiga qarshi kafolatlar berish, shuningdek, o‘z xavfsizligimizni ta’minlash bo‘ladi”, dedi Makron.
Fransiya yetakchisi hukumat va qurolli kuchlar shtabiga “yosh ko‘ngillilarga qurolli kuchlarda o‘qish va saflarini mustahkamlash imkoniyatini berish” uchun may oyigacha takliflar ishlab chiqishni so‘rab murojaat qildi.
“Biz ko‘ngillilarni yanada samaraliroq aniqlashimiz, ularni tayyorlashimiz va zarur paytda Fransiya hududida yoki boshqa joylarda qo‘shinlarni qo‘llab-quvvatlash uchun safarbar qilishga tayyor bo‘lishimiz kerak. Professional armiyadan so‘ng, endi biz qo‘shimcha yordam va kuchaytirishni ta’minlash uchun professional zaxira kuchlarini safarbar qilishimiz lozim”, dedi u.
Izoh (0)