2022-yilning birinchi yarmida O‘zbekiston Prezidenti Virtual va Xalq qabulxonalari orqali davlat organlari va tashkilotlari, shuningdek, mahalliy hokimliklarga jami 773 mingga yaqin murojaat kelib tushgan. Bu haqda Senatning 32-yalpi majlisida ma’lum qilindi.
Qayd etilishicha, mazkur murojaatlarda respublika aholisi tomonidan eng ko‘p ijtimoiy nafaqalar (80 ming), davlat organlari xodimlari faoliyatidan norozilik (58 ming), majburiy ijro, aliment va qarz summalarini undirish (51 ming), moddiy yordam va homiylik (46 ming), bandlik (35 ming), uy-joy (33 ming), gaz ta’minoti (28 ming), elektr energiyasi (27 ming), sudlarda fuqarolik ishlari (26 ming), bank kreditlari (23 ming), kambag‘allikka qarshi kurash, oilaviy tadbirkorlikni rivojlantirish dasturlari, hokim yordamchilari faoliyati (22 ming), yo‘l infratuzilmasi (17 ming), huquqbuzarliklarning oldini olish (17 ming), sog‘liqni saqlash (16,5 ming), huquqni muhofaza qilish (16 ming) hamda ichimlik suvi (15 ming) bilan bog‘liq masalalar ko‘tarilgan.
Ayniqsa, muhtojlarga bir martalik moddiy yordam, sud qarorlari ijrosi, tabiiy gaz va kadastr masalalari bilan bog‘liq murojaatlar soni o‘tgan yilning mos davriga nisbatan ikki baravardan ortiq o‘sgan.
Ijtimoiy sohada murojaatlar soni 18 foizga kamaygan bo‘lsa-da, Ta’lim sifatini nazorat qilish davlat inspeksiyasida 108 foizga, Tibbiy-ijtimoiy xizmatlarni rivojlantirish agentligi tizimida 67 foizga keskin ortgan. Sud-huquq sohasida murojaatlar soni Adliya vazirligi tizimida 58 foizga, Ichki ishlar vazirligida 20 foizga, Majburiy ijro byurosida 20 foizga ortgan.
Hokimliklar tizimida eng ko‘p murojaatlar Toshkent shahar, Qashqadaryo va Surxondaryo viloyatlariida (14–18 mingta) kuzatiladi.
Hisobot davrida Qishloq xo‘jaligi vazirligi tizimida (6 foiz), “Navoiy kon-metallurgiya kombinati” AJ (12 foiz), Din ishlari bo‘yicha qo‘mita (18 foiz), Oliy va o‘rta maxsus ta’limi hamda Qurilish vazirliklari (19 foiz), shuningdek, Andijon viloyati (11 foiz), Namangan (15 foiz), Navoiy (16 foiz) hamda Qashqadaryo (19 foiz) hokimliklarida murojaatlarni ijobiy hal etish darajasi past bo‘lgan.
Senatorlar tomonidan yuqorida qayd etilgan murojaatlarning tahlili ayrim davlat organlari va tashkilotlari tizimida, shuningdek, hokimliklarda murojaatlar bilan ishlash faoliyatida e’tibor qaratilishi lozim bo‘lgan muammolar saqlanib qolayotganligini hamda bu boradagi murojaatlar tahlili o‘tkazilmagani, ushbu soha bo‘yicha ichki nazorat ishlari talab darajasida tashkil etilmagani tanqid qilingan.
Shuningdek, muhokamalar natijasida vazirlik va idoralar hamda mahalliy davlat hokimiyati organlariga aholi murojaat qilishga eng ko‘p majbur bo‘layotgan tizimli muammolar va ularni keltirib chiqaruvchi omillarni mahalla yoki quyi tizimning o‘zida bartaraf etish choralarini ko‘rish, barcha darajadagi rahbarlar muloqotlar va sayyor qabullarni tizimli tashkillashtirish hamda murojaatlarni joyida hal qilish choralarini ko‘rish, ijtimoiy tarmoqlardagi murojaatlarni tezkorlik bilan o‘rganish va ularga o‘z vaqtida munosabat bildirish amaliyotini kengaytirish tavsiya qilingan.
Izoh (0)