Pokiston sudi 25-yanvar kuni to‘rt kishini ijtimoiy tarmoqlarda islom dini arboblari va Qur’oni Karim haqida haqoratomuz materiallarni e’lon qilganlikda ayblab, o‘limga hukm qildi. Ularning advokati shikoyat arizasi tayyorlanayotganini aytdi.
Mamlakatning Xudoga kufr keltirish to‘g‘risidagi qonunlariga ko‘ra, islom dini yoki uning din peshvolarini haqorat qilishda aybdor deb topilgan har bir kishi o‘lim jazosiga hukm qilinishi mumkin. Hukumat bunday jazoni hali qo‘llamagan, ammo shakkoklikda ayblash olomon zo‘ravonligi yoki repressiyaga sabab bo‘lishi mumkin.
Ravalpindi shahridagi sudya Tariq Ayub Xudoga shak keltirish, din peshvolariga hurmatsizlik va Qur’onni tahqirlash kechirib bo‘lmaydigan jinoyatlar ekanligini hamda bunday holatlarda rahm-shafqatga o‘rin yo‘qligini ta’kidladi.
Sudya o‘lim jazosiga hukm qilish bilan birga, to‘rt kishining har biriga 4,6 million rupiya (taxminan 16 500 AQSH dollari) miqdorida jamoaviy jarima soldi va yuqori sud tomonidan o‘lim hukmlari bekor qilingan taqdirda, ularni qamoq jazosiga ham mahkum etdi.
Ayblanuvchilarning himoyachisi Manzur Rahmoniy sud qarorini va tergov organlarida dalillar yo‘qligini keskin tanqid qildi.
Bunday hollarda yuzaga keladigan shubha va noaniqliklar sudlar tomonidan e’tiborsiz qoldirilmoqda. Buning sababi, ehtimol, agar ayblanuvchi oqlansa, diniy reaksiya va olomonning sudyaga qarshi zo‘ravonligidan qo‘rqishdir, dedi Rahmoniy.
U ushbu qaror ustidan apellyatsiya tayyorlab, uni Oliy sudga yuborishini ma’lum qildi.
1980-yillarda Pokistonda Xudoga shak keltirishga qarshi qabul qilingan qonunlar islomni haqorat qilishni noqonuniy deb belgilagan.
O‘shandan buyon odamlar dinni tahqirlashda, uning muqaddas matnlarini haqoratlashda yoki masjid devorlariga haqoratli so‘zlar yozishda ayblanib kelmoqda. Qonun tanqidchilari uning shaxsiy nizolarni hal qilish uchun qo‘llanilayotganini ta’kidlashmoqda.
Izoh (0)