Samarqand shahrida 19 yoshli qiz o‘zini 9-qavatdan tashlab joniga qasd qilgani haqida xabar berilgan edi. Voqea yuzasidan qo‘shimcha tafsilotlar aytildi.
Ma’lum qilinishicha, 1-kurs talabasi bo‘lgan marhuma o‘zini tashlashga uringan uyda amakisi va buvisi bilan birga yashagan. Ota-onasi esa xorijda ekani aytilmoqda. Qizni ushlab qolishga, qutqarishga harakat qilgan yigit ham voqea haqida aytib berdi.
“Dod-voy qilganini ko‘rib qoldim. Yiqilaman, deb ilinib turgan ekan. Qutqarishga harakat qildim, ushlab oldim. Lekin xohlamadi qutqarishimizni, silkinaverdi. O‘zini tashlab yubordi”, deydi yigit.
Hozirda marhumaning barcha oila a’zolari tergovga jalb qilingan. Onasi marhuma bir qo‘ng‘iroqdan so‘ng birdaniga o‘zini tashlab yuborganini bildirgan.
Hodisa joyi tergov tezkor guruhi tomonidan ko‘zdan kechirilib, S.M.ning o‘limi sababini aniqlash maqsadida sud-tibbiy ekspertizasi tayinlangan. Qizga tegishli bo‘lgan uyali telefon apparati olib qo‘yilgan va ish uchun ahamiyatli ma’lumotlar mavjudligiga aniqlik kiritish uchun Kiberxavfsizlik markazi DUK tomonidan kompyuter texnikaviy ekspertizasi tayinlangan.
Hozirda mazkur holat yuzasidan Samarqand shahar prokuraturasi tomonidan tergovga qadar tekshiruv harakatlari olib borilmoqda.
Marhuma Samarqand shahrida joylashgan ISFTda 1-bosqich talabasi bo‘lgan. U hali turmush qurmagan.
Bundan avval 2025-yil yanvarida Qo‘qondagi talabalar turar joyida talaba qiz o‘z joniga qasd qilgani haqida xabar berilgan edi. Prokuratura surishtiruv natijalariga ko‘ra, mazkur holat shaxsiy muammolar sababli sodir bo‘lgani aniqlangan va jinoyat ishi qo‘zg‘atish rad etilgan.
Izoh (0)