AQSHning Tennesi shtati Neshvill shahridagi maktabda o‘smir yigit otishma uyushtirdi. Hujum oqibatida o‘quvchi qiz halok bo‘ldi, yana bir o‘quvchi yaralandi. Bu haqda CNN xabar berdi.
Ma’lum qilinishicha, 17 yoshli yigit Antiox o‘rta maktabi oshxonasida 16 yoshli qizga qarata bir necha marotaba o‘q uzgan. Keyinchalik u o‘z joniga qasd qilgan. Politsiya hujum uyushtirgan o‘smir Solomon Henderson ekanini aniqlagan.
Otishmada jabrlangan o‘quvchi yigit qo‘lidan jarohat olgan va davolanib, qo‘yib yuborilgan. Yana bir yigit esa yuzidan jarohat olgan, ammo unga o‘q tegmagan. Ular to‘g‘ridan to‘g‘ri yoki tasodifan Henderson tomonidan nishonga olingani noma’lum.
“Shu paytgacha o‘tkazilgan tergov Henderson va otishma qurbonlari o‘rtasida biror aloqa borligi aniqlamadi. Ehtimol, ular oshxonada uning tasodifiy nishoniga aylangan”, deyiladi Neshvill politsiyasi bayonotida.
Bu AQSHdagi maktabda 2025-yilda kuzatilgan ilk otishma hisoblanadi
2024-yilgi so‘nggi otishma 17-dekabr kuni Viskonsin shtati Medison shahridagi maktabda yuz bergandi. O‘shanda 15 yoshli qiz otishma uyushtirishi tufayli bir nafar o‘quvchi, o‘qituvchi va qizning o‘zi halok bo‘lgan. U o‘ziga ham o‘q uzgan va olgan jarohati oqibatida kasalxonaga olib ketilayotganda vafot etgan. Jarohatlanganlar soni 6 kishini tashkil etgan.
AQSHda so‘nggi yillarda huquqni muhofaza qilish organlari maktabda o‘q otgan bolalarning ota-onalariga qarshi ayblov qo‘ymoqda. Misol uchun:
- 2021-yil noyabr oyida Itan Michigan shtatidagi o‘rta maktabda otishma uyushtirgani sababli ota-onasi 10 yildan 15 yilgacha qamoq jazosiga hukm qilingan.
- Jorjiya shtatidagi Apalachee o‘rta maktabida ommaviy otishma uyushtirgan 14 yoshli Kolt Greyning otasiga joriy yilning boshida 29 ta ayb qo‘yilgan.
Izoh (0)