Samarqand shahrida 19 yoshli qiz o‘zini 9-qavatdan tashlab joniga qasd qildi. Ijtimoiy tarmoqlarda holat aks etgan tasvirlar tarqaldi.
Unda qiz ko‘p qavatli uy derazasida osilib turgani, uni ikki kishi ushlab qolishga uringani, biroq qiz bunga qarshilik qilib, tipirchilagani, so‘ng tushib ketganini ko‘rish mumkin.
Bosh prokuratura axborot xizmati rahbari Hayot Shamsutdinovning “Daryo”ga ma’lum qilishicha, voqea 19-fevral kuni soat 17:00 atrofida sodir bo‘lgan. 2005-yilda tug‘ilgan S.M. Samarqand shahrida joylashgan ko‘p qavatli uyning 9-qavatidagi xonadonning derazasidan o‘zini pastga tashlab joniga qasd qilgan.
Hodisa joyi tergov tezkor guruhi tomonidan ko‘zdan kechirilib, S.M.ning o‘limi sababini aniqlash maqsadida sud-tibbiy ekspertizasi tayinlangan. Qizga tegishli bo‘lgan uyali telefon apparati olib qo‘yilgan va ish uchun ahamiyatli ma’lumotlar mavjudligiga aniqlik kiritish uchun Kiberxavfsizlik markazi DUK tomonidan kompyuter texnikaviy ekspertizasi tayinlangan.
Hozirda mazkur holat yuzasidan Samarqand shahar prokuraturasi tomonidan tergovga qadar tekshiruv harakatlari olib borilmoqda.
Marhuma Samarqand shahrida joylashgan ISFT’da 1-bosqich talabasi bo‘lgan. U hali turmush qurmagan bo‘lib, buvisi bilan yashab kelgan.
2025-yil yanvarida Qo‘qondagi talabalar turar joyida talaba qiz o‘z joniga qasd qilgani haqida xabar berilgan edi. Prokuratura surishtiruv natijalariga ko‘ra, mazkur holat shaxsiy muammolar sababli sodir bo‘lgani aniqlangan va jinoyat ishi qo‘zg‘atish rad etilgan.
Izoh (0)