Ijtimoiy tarmoqlarda Farg‘ona viloyatida joylashgan “Eski Yevropa” qabristoni buzib tashlanayotgani aytilgan video tarqaldi. Madaniy meros agentligi mazkur xabarga izoh berdi.
Qayd etilishicha, olingan tasvirlarda qabriston boshqa hududga ko‘chirilishi aytilgan. Madaniy meros agentligi Farg‘ona viloyati boshqarmasi xodimlari tomonidan vaziyat joyiga chiqqan holda o‘rganildi.
Farg‘ona shahrining Iftixor ko‘chasida joylashgan mazkur nasroniy qabristonidan 1974-yildan buyon foydalanmay kelinmoqda. Viloyat obodonlashtirish boshqarmasi xodimlari tomonidan bahor kelishi munosabati bilan qabriston maydonida har yillik tozalash va obodonlashtirish ishlari olib borilgan.
Mazkur qabristonning buzilishi haqidagi xabarlar hech qanday asosga ega emas va keltirilgan da’volar videoga tushiruvchining shaxsiy farazlariga qurilgan.
Undan tashqari mozor hududi Vazirlar Mahkamasining 2019-yil 4-oktyabrdagi “Moddiy madaniy merosning ko‘chmas mulk obyektlari milliy ro‘yxatini tasdiqlash to‘g‘risida”gi 846-sonli qarorida madaniy meros obyektlari milliy ro‘yxatiga kiritilmaganini ma’lum qilamiz, deyiladi xabarda.
Ma’lumot uchun, mazkur qabriston o‘z faoliyatini bir necha o‘n yil avval to‘xtatgani bois hudud qarovsiz va deyarli kimsasiz holatga tushib qolgan.
Bundan avval Madaniy meros agentligi Andijondagi Bobur haykali ko‘chirilishi yuzasidan xulosa olish uchun tushunchalar berilganini ma’lum qilgandi.
Izoh (0)