Turk shou-biznesi olamidagi yangiliklarni o‘tkazib yuborgan muxlislar uchun iyul oyining so‘nggi kunlarida mashhur aktyor va aktrisalar hayotida bo‘lib o‘tgan eng qiziqarli xabarlarni to‘pladik.
Yulduzli juftliklar ichida eng namunaviy oilalardan biri deya e’tirof etilgan aktyorlar — Barish Arduch va Gupse O‘zay Turkiyaning Alachati kurort shahrida dam olish kunlarini maroqli o‘tkazmoqda. Yulduzlar ko‘chada sayr qilib yurgan vaqtda jurnalistlar qurshovida qoldi va atrofga yig‘ilgan barcha muxlislar bilan do‘stona suhbatlashdi. Arduch va O‘zay xohlovchilar bilan birga esdalik uchun suratga tushdi va barchada iliq taassurot qoldirdi.
So‘nggi kunlarda Hakan Kurtash bilan munosabati tufayli matbuotda doimiy ravishda tilga olinayotgan Birje Akalay yana obyektiv e’tiboriga tushdi. Kechasi aktrisa qallig‘i Hakan bilan kasalxonaga bordi. Ma’lum bo‘lishicha, u hozirda suratga olinayotgan “Qabriston” seriali syomka jarayonlarida yiqilib tushgan. Tekshiruvlar Akalayning jiddiy jarohat olmagani va uning sog‘lig‘i yaxshi ekanligini tasdiqladi.
“Ijaraga olingan sevgi” loyihasidagi Defne roli bilan mashhur bo‘lgan Elchin Sangu xonanda Karsuning konsertiga tashrif buyurdi va u yerda jurnalistlarga intervyu berdi. Aktrisa uzoq vaqt davomida ekranlarda ko‘rinmagani sababini sog‘lig‘i bilan izohladi: “Bir muddat davomida men psixoterapevt yordamiga muhtoj bo‘ldim”, deya tan oldi aktrisa.
So‘nggi marta Bodrumdagi sport markazlaridan biridan chiqib kelayotgan vaqtda muxlislar e’tiboriga tushgan Kivanch Tatlitug‘ shunchaki dam olayotganini aytdi. “Yangi mavsumda siz kutmagan hodisalar bo‘ladi”, deya aktyor yangi loyihalar borligiga ishora qildi.
Ma’lumotlarga ko‘ra, aktyorga uchta loyihada: “Buyuk qochish”, “Albor oilasi” va “Ishg‘ol vaqtidagi muhabbat” kabi seriallarda suratga tushish taklif etilgan. Aktyor qaysi loyihani tanlagani hozircha noma’lum. Agar Kivanch Tatlitug‘ “Ishg‘ol vaqtidagi muhabbat” loyihasida ishtirok etsa, uning partnyori Neslihan Atagul bo‘ladi.
“Yettinchi bo‘lmadagi mo‘jiza” filmi yulduzi Ilker Aksum kuni kecha turmush o‘rtog‘i Dilay Ekmekchio‘g‘ludan ajoyib xushxabar oldi. Uning rafiqasi homiladorlikning 8-haftasida.
Uch oy avval ona bo‘lgan aktrisa Eda Eje turmush o‘rto‘g‘i, basketbolchi Bugrahan Tuncherni Instagram’dagi obunachilari ro‘yxatidan o‘chirib tashladi. Bu esa yulduzlar oilasi ajrashishi haqidagi turli salbiy mish-mishlarni keltirib chiqardi.
Bunga javoban Eda Eje jurnalistga matbuotda paydo bo‘lgan ajralish haqidagi xabarlarga aniqlik kiritdi: “Ajrim haqidagi xabarlarning bari haqiqatdan yiroq. Bugra shundoq ham Instagram’dan foydalanmaydi, u o‘z profilini o‘chirib tashlashni istagan edi. Bizning endigina uch oyni qarshilagan farzandimiz bor. Qanday qilib biz ajralishimiz mumkin? Mayli, men bunday xabarlarga o‘rganib qolganman. Biz hozirda baxtlimiz va qizimiz parvarishi bilan bandmiz”, dedi aktrisa.
Xonanda Karsu konsertiga turmush o‘rtog‘i Umut Evergen bilan tashrif buyurgan Alina Bo‘z jurnalist bilan suhbatlashdi. Aytishlaricha, ular yaqinda Moskvadan qaytishgan:
“Biz oila a’zolarimiz oldiga mehmonga ketgan edik. Umutga bolaligim o‘tgan joylarni ko‘rsatdim, Rossiya turmush o‘rtog‘imda ijobiy taassurot qoldirdi. Bu davr biz uchun unutilmas voqea bo‘ldi”, dedi aktrisa.
“Jangchi” serialida birga rol ijro etgan Berk Oktay va Yildiz Chagri Atiksoy 2022-yilda turmush qurgan. 2024-yil may oyida ular qiz farzandli bo‘lishdi va chaqaloqqa Mira Milena deya ism qo‘yishdi.
Hozirda ilk bor ota bo‘lishdan xursand bo‘lgan Berk Oktay vaqti-vaqti bilan farzandining yuzini ko‘rsatmasdan ijtimoiy tarmoqlarda qizi bilan tushgan suratlarini baham ko‘radi.
Va uning rafiqasi ham chaqaloq barmog‘ini ushlab turgan lahza aks etgan suratni joyladi va unga: “Qalbimni eritib yubordi” deya izoh qoldirdi.
Izoh (0)