Qirg‘iziston prezidenti Sadir Japarov “Kabar” agentligiga bergan intervyusida qabristonlardagi yodgorlik va to‘siqlar hamda ular bilan bog‘liq muammolar yuzasidan o‘z fikrlarini bildirdi.
Japarov shariat qoidalariga ko‘ra, musulmonlarga qimmatbaho toshlardan qabr toshlar o‘rnatish va marhumning suratlarini qo‘yish, qabrni temir devorlar bilan to‘sish, sement hamda betondan foydalanish taqiqlanganini eslatdi.
“Bu marhumga yordam bermaydi, aksincha ruhiga azob beradi. Ikkinchidan, mamlakatimiz hududining 94 foizini tog‘lar egallaydi. Tekisliklar atigi 6 foiz. Ana shu olti foiz yerda shahar va qishloqlar bunyod etilgan. Haydaladigan yerlar kam. Biz o‘zimizni hatto bug‘doy bilan ham to‘liq ta’minlay olmaymiz, unni import qilamiz. Shuning uchun faqat bugungi kun bilan yashay olmaymiz. Har birimiz 40-50 yildan keyin farzandlarimiz, avlodlarimiz qanday yashashi haqida qayg‘urishimiz kerak. Agar buni hozir ko‘rib chiqmasak, kelajakda ular uchun bosh og‘riqqa aylanadi”, dedi Sadir Japarov.
Uning so‘zlariga ko‘ra, aynan shu sababli Davlat ipoteka kompaniyasi faoliyati ishga tushirilgan. Buning uchun har yili byudjetdan mablag‘ ajratiladi.
“Kelgusi yillarda qishloqlarda ham ko‘p qavatli uylar quramiz. Hozir ayrim kichik shaharchalar va viloyat markazlarida bunday ishlar boshlandi. Agar ish shu sur’atda davom etsa, 10-15 yildan keyin har bir qirg‘izistonlik uy-joy muammosiga duch kelmaydi”, deb tushuntirdi prezident.
Uning ma’lumotiga ko‘ra, 500 ta xonadondan iborat Ken-Suu qishlog‘ida 100 ga yaqin yoshlar yer uchastkalariga navbat kutmoqda. 150 xonadonli qishloqlarda esa 50 ga yaqin yoshlar navbatda turibdi. Bu muammo har bir qishloqda kuzatilmoqda. Ayrim uylarda yer yo‘qligi sababli bir necha oila yashashiga to‘g‘ri keladi.
“Shuning uchun shariatga ko‘ra, qabriston qanday bo‘lmasin, oxirgi dafn etilganidan 25 yil o‘tgach, bu yerdan foydalanish mumkin, degan qaror bor. Xuddi shunday norma Jogorku Kenesh tomonidan qabul qilingan tegishli qonunlarda ham nazarda tutilgan. Yuqorida men faqat o‘z qishlog‘imni misol qilib keltirdim. Qachonlardir sobiq qabriston bo‘lgan yerlar Ittifoq parchalanib ketganidan keyin uy-joy qurish uchun berilgan. Hozir u yerda uylar, polizlar bor”, deya qo‘shimcha qildi Japarov.
Izoh (0)