Ijtimoiy tarmoqlarda Andijon shahrida joylashgan Zahiriddin Muhammad Bobur haykalini ko‘chirib, o‘rniga turar joy qurish rejalashtirilganligi haqidagi xabar keng muhokamalarga sabab bo‘ldi.
Andijon viloyat hokimligi ushbu xabar yuzasidan munosabat bildirib, maydonning Bobur shohko‘chasini bog‘lovchi ko‘prik ostida qolib ketishi bilan bog‘ladi. Shuningdek, ilmiy kengash vakillari, boburshunoslar hamda Andijon oqsoqollari boshchiligida ushbu mavzu muhokama etilib, kerakli xulosa olinganini ma’lum qildi.
“Daryo” muxbiri bilan suhbatda bo‘lgan hokimlik matbuot kotibi Muslimbek Ibrohimov O‘zbekiston Respublikasi Madaniy meros agentligining ilmiy-ekspertlar kengashidan xulosa olinganligini bildirgan. Madaniy meros agentligi mazkur holat yuzasidan munosabat bildirdi.
Ta’kidlanishicha, holat yuzasidan Andijon viloyati Madaniy meros boshqarmasi mutaxassislari tomonidan o‘rganish ishlari olib borilgan.
Zahiriddin Muhammad Bobur monumental san’at yodgorligi O‘zbekiston Respublikasi Vazirlar Mahkamasining 2019-yil 4-oktyabrdagi 846-sonli qarori bilan Moddiy madaniy merosining ko‘chmas mulk obyektlari Milliy ro‘yxatiga kiritilgan.
“Davlat kadastrlari palatasi Andijon viloyati boshqarmasi tomonidan 2024-yilning 8-noyabrida Andijon viloyati Madaniy meros boshqarmasiga Andijon shahar Bobur hamda Amir Temur shohko‘chalari kesishmasidagi Zahiriddin Muhammad Bobur monumental san’at yodgorligini Andijon shahar A.Fitrat ko‘chasida joylashgan “Jome me’moriy majmuasi” arxitektura yodgorligi hududiga ko‘chirilishi yuzasidan murojaat kelib tushgan.
Ma’lumki, “O‘zbekiston Respublikasi Madaniy meros obyektlarini muhofaza qilish va ulardan foydalanish to‘g‘risida”gi qonunining 20-moddasi 5-bandida “Moddiy madaniy meros obyektini hozirgi zamonda foydalanishga moslashtirish – moddiy madaniy meros obyektining tarixiy-badiiy qiymatini asralishini o‘zgartirmasdan uning tarixiy-madaniy qimmatga ega bo‘lgan unsurlarini ta’mirlash asosida undan hozirgi zamonda foydalanishga shart-sharoit yaratish maqsadida amalga oshiriladigan ilmiy va ilmiy-texnik tadqiqotlar, loyihalash hamda ishlab chiqarish ishlarini amalga oshirish” belgilab qo‘yilgan.
Shu bilan birga, O‘zbekiston Respublikasi Vazirlar Mahkamasining 2019-yil 30-martdagi 265-son qarori 6-ilovasi 9.5-bandida “Moddiy madaniy merosning ko‘chmas mulk obyektlari va ularning qo‘riqlanadigan tegralarida yer qazish, yer tuzish, qurilish, melioratsiya va boshqa xo‘jalik ishlari, asrashga doir ishlarni amalga oshirish hamda ilmiy va ilmiy-texnik tadqiqotlar o‘tkazishga oid loyihalarga Madaniy meros agentligi huzuridagi Ilmiy-ekspert kengashi tomonidan xulosa berish belgilangan.
Yuqoridagilardan kelib chiqib, Boshqarma tomonidan Zahiriddin Muhammad Bobur monumental san’at yodgorligini ko‘chirish masalasi yuzasidan tegishli tashkilotlarga Madaniy meros agentligi huzuridagi Ilmiy-ekspert kengashidan xulosa olish uchun tushunchalar berilgan”, deyiladi munosabatda.
Munosabatda ko‘rish mumkinki, Ilmiy-ekspert kengashi tomonidan Bobur haykalini ko‘chirish yuzasidan hali xulosa berilmagan.
Agentlik matbuot kotibi Mohinur Imomova murojaat yuzasidan hujjatlar endi tayyorlanayotganini, natijalar tez orada ma`lum qilinishini bildirgan.
Izoh (0)