Madaniy meros obyektlarida tashqi reklama joylashtirish “Reklama to‘g‘risida”gi qonunga asosan qat’iy taqiqlanib, ushbu obyektlar va ularning yondosh hududlari reklamadan holi etib belgilangan. Biroq joylarda mazkur qonun talabini qo‘pol ravishda buzish holatlari kuzatilmoqda, deb xabar beradi Bosh prokuratura matbuot xizmati.
Ma’lum qilinishicha, prokuratura idoralari tomonidan mutasaddi idoralar birgalikda 5 ta qadimiy shaharda joylashgan 1000 dan ortiq madaniy meros obyektida reklama va axborot ko‘rsatgichlari o‘rnatilishi qonuniyligi o‘rganilgan. Unda qonunchilik talablariga zid ravishda 72 ta obyektlarga 121 ta reklama o‘rnatilgani aniqlangan.
Jumladan, Buxoroda 27 ta madaniy meros obyektida — 50 ta, Samarqandda 25 ta obyektda — 45 ta, Toshkent shahrida 18 ta obyektda — 24 ta, Xivada 2 ta obyektda —2 ta reklama banneri o‘rnatilgan.
Xususan, Buxoro shahrida joylashgan noyob arxitektura yodgorligi toifasiga kiruvchi XIX asrga oid “Ibrohim Oxund” madrasasida 6x3 o‘lchamdagi “go‘zallik saloni” reklama banneri o‘rnatilib, obyektning tarixiy ko‘rinishi to‘liq yopib qo‘yilgan. Toshkent shahridagi XX asrga oid “Bahor” restorani binosida 7 x 9 o‘lchamdagi “bilyard va restoran” reklama banneri o‘rnatilib, bino tarixiy ko‘rinishi ko‘rimsiz holatga keltirilgan.
O‘rganishlar davomida 53 ta obyektda noqonuniy o‘rnatilgan 99 ta reklama bannerlari olib tashlanishi ta’minlanib, madaniy meros obyektlari ko‘rinishi asl holatiga qaytarilgan. Shuningdek, 19 ta obyektda noqonuniy o‘rnatilgan 22 ta reklama bannerini olib tashlash yuzasidan mutasaddi shaxslarga yozma ko‘rsatmalar berilgan.
Avvalroq Samarqandda Afrosiyob arxeologik obyekti yaqinida kovlangan chuqurdan eski sopol buyum va qabriston qoldiqlari topilgani, Turkiya agentligi Buxoro Arkidagi jome masjidini tiklash va ta’mirlash ishlariga mablag‘ ajratmoqchi ekani, Madaniy meros obyektlariga yetkazilgan katta zarar yuzasidan Turizm vazirligiga taqdimnoma kiritilgani to‘g‘risida xabar berilgandi.
Mavzuga doir:
Izoh (0)