Rossiya Mudofaa vazirligi “Vatan himoyachilari panteoni” harbiy qabristonini kengaytirish uchun Moskva viloyatida joylashgan Pirogovskiy o‘rmon bog‘ining 17 gektar maydonini o‘z foydalanishiga oldi. Bu haqda 3-may kuni “Novaya gazeta Yevropa” xabar berdi.
Mudofaa vazirligining Rossiyadagi eng yirik harbiy qabristonni kengaytirish bo‘yicha rejalari avvalroq Mitishi shahar okrugi ma’muriyati tomonidan tasdiqlangan. Tuman ma’muriyati go‘yoki “panteon”ni kengaytirish uchun 10 gektar va shahar qabristonini qurish uchun 7 gektardan foydalanishini aytgan.
Keyinchalik Vatan himoyachilari panteoniga aylangan Federal urush yodgorligi qabristonida 2013-yil iyunidan 1-iyulgacha 353 ta dafn o‘tkazilgan. 2022-yil 24-fevraldan boshlab faqat Ukrainadagi frontda halok bo‘lganlar dafn etilgan sektorga 900 dan ortiq qabrlar qo‘shilgan.
Qabristonda harbiy sharaf bilan dafn marosimlari har kuni bo‘lib o‘tadi, — deydi yodgorlik yonidagi qishloq aholisi.
Rejalashtirilgan kengaytirishdan oldin qabriston maydoni 52,24 gektar bo‘lgan, kelgusi 200 yil ichida bu hududda 40 ming qabr joylashtirilishi mumkin deb taxmin qilingan edi.
BBC 2024-yil 26-aprel holatiga ko‘ra, Ukrainada 51 679 nafar rossiyalik harbiy halok bo‘lganini tasdiqlagan.
2024-yil fevral oyi oxirida Ukraina prezidenti Vladimir Zelenskiy urush boshlanganidan beri birinchi marta mamlakatning harbiy yo‘qotishlarini e’lon qilgan — uning so‘zlariga ko‘ra, ular 31 ming kishini tashkil qilgan. Rossiya rasmiylari Ukrainadagi yo‘qotishlar haqida rasmiy ma’lumotlarni e’lon qilmagan.
Izoh (0)