Ижтимоий тармоқларда Фарғона вилоятида жойлашган “Эски Европа” қабристони бузиб ташланаётгани айтилган видео тарқалди. Маданий мерос агентлиги мазкур хабарга изоҳ берди.
Қайд этилишича, олинган тасвирларда қабристон бошқа ҳудудга кўчирилиши айтилган. Маданий мерос агентлиги Фарғона вилояти бошқармаси ходимлари томонидан вазият жойига чиққан ҳолда ўрганилди.
Фарғона шаҳрининг Ифтихор кўчасида жойлашган мазкур насроний қабристонидан 1974 йилдан буён фойдаланмай келинмоқда. Вилоят ободонлаштириш бошқармаси ходимлари томонидан баҳор келиши муносабати билан қабристон майдонида ҳар йиллик тозалаш ва ободонлаштириш ишлари олиб борилган.
Мазкур қабристоннинг бузилиши ҳақидаги хабарлар ҳеч қандай асосга эга эмас ва келтирилган даъволар видеога туширувчининг шахсий фаразларига қурилган.
Ундан ташқари мозор ҳудуди Вазирлар Маҳкамасининг 2019 йил 4 октябрдаги “Моддий маданий мероснинг кўчмас мулк объектлари миллий рўйхатини тасдиқлаш тўғрисида”ги 846-сонли қарорида маданий мерос объектлари миллий рўйхатига киритилмаганини маълум қиламиз, дейилади хабарда.
Маълумот учун, мазкур қабристон ўз фаолиятини бир неча ўн йил аввал тўхтатгани боис ҳудуд қаровсиз ва деярли кимсасиз ҳолатга тушиб қолган.
Бундан аввал Маданий мерос агентлиги Андижондаги Бобур ҳайкали кўчирилиши юзасидан хулоса олиш учун тушунчалар берилганини маълум қилганди.
Изоҳ (0)