Qirg‘iziston prezidenti xalqini qabristonlardagi yodgorliklardan voz kechishga chaqirdi

Qirg‘iz urf-odatlarida qabristonlarga yodgorlik o‘rnatish nazarda tutilmagan, deya mamlakat prezidenti Sadir Japarov eslatib o‘tdi.

Uning qayd etishicha, Qirg‘iziston hududining 94 foizini tog‘lar egallagan, mamlakatda ekin maydonlari kam, aholi o‘sishi bilan yashashga yaroqli yerlar kamaymoqda.

Biz kelajak avlodlar haqida o‘ylashimiz shart, bugun bilan yashamasligimiz kerak, deydi Japarov.

Japarovga ko‘ra, Qirg‘iziston qonunchiligi va shariatga ko‘ra, qabriston yopilganidan keyin uning hududidan 25 yil o‘tgach foydalanish mumkin. U siyosatchi sifatida qirg‘iz xalqini qabristonlardagi yodgorliklardan voz kechishga chaqirgan.

Uning ta’kidlashicha, ayrim fuqarolar jamoatchilik tomonidan gap-so‘z bo‘lishidan xavotirlanib, yaqinlariga haykal o‘rnatadi. “Bo‘lmag‘ur gaplar”ga qarshi kurashish uchun davlat rahbari o‘zini misol qilib ko‘rsatishni taklif qilgan.

Men har kuni ertalab marhumlar haqqiga duo o‘qiyman, buning o‘zi qabristondagi yodgorlikdan million marta foydalidir, deya xulosa qilgan Japarov.