AQSH prezidenti Jo Bayden Kursk viloyatidagi vaziyatdan muntazam xabardor bo‘lib turibdi. Bu haqda Oq uyga tayanib “RIA Novosti” xabar berdi.
Men xodimlarim bilan so‘nggi olti-sakkiz kun ichida har 4-5 soatda xabarlashib turibman. Bu Putin uchun haqiqiy dilemma yaratadi. Biz ukrainaliklar bilan bevosita va doimiy aloqadamiz. Vaziyat faol fazada, deydi AQSH yetakchisi.
Bayden shu kungacha Ukraina qurolli kuchlarining Kursk viloyatidagi hujumi haqida ochiq gapirishdan bosh tortgan.
Avvalroq Bloomberg Ukraina Rossiya hududiga bostirib kirishi uchun AQSH va Yevropa Ittifoqi rahbariyatining “roziligi”ni olgani hamda Rossiyaga kutilmagan hujumning bir nechta ssenariylarini ko‘rib chiqayotgani haqida xabar bergan edi.
Ukrainaning Kursk viloyatiga hujumi
6-avgust kuni ertalab Ukraina armiyasi bo‘linmalari Kursk viloyatining Sudja tumani hududining bir qismini egallab olishga uringan. Ukraina bosh qo‘mondoni Aleksandr Sirskiy Rossiyaning Ukrainadagi ikki yarim yillik bosqini endi uning o‘z yerlariga qaytayotganini aytgan. Mavjud vaziyat tufayli Rossiya istasa ham Kurskdagi ukrain bo‘linmalarni tezda yo‘q qilolmasligi taʼkidlangan.
Rus mahalliy nashrlariga ko‘ra, Rossiya hukumati g‘arbiy viloyatlardan aholini evakuatsiya qilishni faol davom ettirmoqda. Hozirgacha 121 ming kishi ko‘chirilgan. Yana 59 ming kishini ko‘chirish rejalashtirilmoqda.
Kursk mahalliy gubernatori hududdagi 28 ga yaqin qishloq Ukraina qo‘shinlari qo‘liga o‘tgani, 12 nafar tinch aholi vakili halok bo‘lgani va vaziyat og‘irligicha qolayotganini xabar bergan. 12-avgust tunida ukrain bo‘linmalari Kursk ichkarisiga 30 kilometrgacha kirib borgan.
Kreml rasmiylari 2 mingga yaqin fuqaro Ukraina bosib olgan hududlarda qolib ketgani haqida xabar bergan. Ayni paytda ular bilan bog‘lanish uchun hech qanday imkoniyat mavjud emas.
Izoh (0)