Moskva va Kiyev o‘rtasida hududlarni ayirboshlash mumkin emas, Rossiya hech qachon o‘z yerlarini ehtimoliy ayirboshlashni muhokama qilmagan va qilmaydi. Bu haqda Rossiya prezidentining matbuot kotibi Dmitriy Peskov ma’lum qildi.
Bu mutlaqo mumkin emas. Rossiya hech qachon o‘z hududini ayirboshlash mavzusini muhokama qilmagan va qilmaydi ham, dedi Peskov.
U Ukraina kuchlari Rossiya hududidan albatta chiqarib yuborilishini ta’kidladi.
Ukraina prezidenti Vladimir Zelenskiy The Guardian nashriga bergan intervyusida Kursk viloyatida Ukraina qo‘shinlari nazoratidagi hududni Rossiya tomonidan bosib olingan Ukraina yerlariga almashtirishga tayyor ekanligini aytgan edi.
Biz bir hududni boshqasiga almashtiramiz, dedi Zelenskiy va Ukraina Rossiya tomonidan bosib olingan yerlarning qaysi qismini so‘rashini hali aniq bilmasligini qo‘shimcha qildi.
Ukraina yetakchisi barcha hududlar muhim ekanini, ular o‘rtasida hech qanday ustuvorlik yo‘qligini ta’kidladi.
Shuningdek, Zelenskiy AQSH prezidenti Donald Tramp ma’muriyatining urush tugaganidan so‘ng Ukrainaga xavfsizlik kafolatlarini Yevropa davlatlari berishi kerakligi haqidagi g‘oyasini tanqid qildi.
Yevropa amerikaliklarsiz xavfsizlik kafolatlarini taklif qilishi mumkin, degan fikrlar bor va men doimo bunga qarshiman, dedi u.
Zelenskiyning so‘zlariga ko‘ra, AQSH ishtirok etmaydigan xavfsizlik kafolatlari “haqiqiy” emas.
Biz tinchlikparvar kontingentni qo‘llab-quvvatlaymiz, agar u xavfsizlik kafolatining bir qismi bo‘lsa, lekin yana bir bor ta’kidlashni istardimki, Amerikasiz buning iloji yo‘q, dedi Zelenskiy va Tramp bilan uchrashuvi sanasi hali belgilanmaganini qo‘shimcha qildi.
Rossiya Tashqi ishlar vazirligining rasmiy vakili Mariya Zaxarova Zelenskiyning so‘zlariga izoh berar ekan, bunday bayonotlar Kursk viloyatidagi "Ukraina Qurolli kuchlari uchun halokatning haqiqiy ko‘lamini" yashirish maqsadida berilayotganini ta’kidladi.
2024-yil 6-avgustda Ukraina armiyasi Kursk viloyatida harbiy operatsiyani boshladi. 12-avgustga kelib, 28 ta aholi punkti Ukraina kuchlari nazoratiga o‘tgani haqida o‘sha paytda viloyat gubernatori vazifasini bajaruvchi Aleksey Smirnov xabar berdi. Yanvar oyida Rossiya Mudofaa vazirligi Ukraina tomoni mintaqaning 1268 kv. km hududini egallab olganini ma’lum qildi (Kursk viloyatining umumiy maydoni - 29,9 ming kv. km). Yanvar oyi o‘rtalariga kelib, Rossiya idorasi ma’lumotlariga ko‘ra, 801 kv. km (63,2%) qaytarib olishga erishilgan.
Kiyev ilgari 1991-yilgi chegaralarga qaytish va Rossiya qo‘shinlarini o‘z hududidan olib chiqib ketishni talab qilgan edi. Keyinchalik Zelenskiy yo‘qotilgan hududlarni kelajakda diplomatik yo‘l bilan qaytarish mumkinligini qayd etgan.
Moskva muzokaralar uchun ochiqligini, Kiyev ulardan voz kechayotganini ta’kidlab, to‘rtta yangi mintaqa va Qrimni Rossiyaning bir qismi sifatida tan olishni talab qilmoqda.
Izoh (0)