Ukraina prezidenti Vladimir Zelenskiy tinchlik bo‘yicha Rossiya bilan muzokaralar olib borish shartini ma’lum qildi. Bu haqda Bloomberg xabar berdi.
Siyosatchining so‘zlariga ko‘ra, Kreml bilan muzokaraga kirishish uchun Vashingtondan kafolat talab etiladi.
Yagona masala — qanday xavfsizlik kafolatlari berilishi va ochig‘ini aytsam, muzokaralardan oldin buni aniq tushunishni istayman, dedi prezident.
U G‘arbning uzoq muddatli majburiyatlarisiz Rossiya yangi hujum uchun qayta qurollanish maqsadida otashkesimdan foydalanishini aytdi. Zelenskiy bu masalani AQSHning ishtirokisiz hal qilib bo‘lmasligini ta’kidladi.
Yo‘q, bunday bo‘lishi mumkin emas. AQSHsiz hech kim tavakkal qilmaydi, dedi u.
Ukraina prezidenti Trampni Xitoy rahbari Si Szinpin bilan bir qatorda bu masalada eng ta’sirli shaxs deb atadi:
O‘ylaymanki, buni haqiqatan ham amalga oshira oladigan boshqa ittifoqchi yo‘q. Putinning iqtisodiyoti Xitoyga juda qaram, ta’kidladi siyosatchi.
Zelenskiyga ko‘ra, Kiyev Ukraina taqdiri o‘zining ishtirokisiz hal qilinishini istamaydi. U AQSH bunga yo‘l qo‘ymasligiga ishonch bildirdi, ammo shuni qo‘shimcha qildi:
Garchi ilgari bunday bo‘lmaganiga ishonchim komil emas. Bu yerda men nafaqat Amerika, balki ba’zi yevropalik hamkorlar haqida ham gapiryapman, dedi u.
Prezident Rossiyaga energiya resurslari, xususan neftga cheklovlar orqali bosim o‘tkazib, uni muzokaralar stoliga o‘tqazish “tinchlik va haqiqiy xavfsizlikning eng muhim kalitlaridan biri” ekanini ta’kidladi.
Kuch yordamida tinchlikka erishish mumkin va biz bunga to‘la ishonch hosil qilganmiz. Eng muhimi — sur’atni pasaytirmaslik va Rossiyaga bosim o‘tkazishdir... Yevropa energiya resurslari sohasida Rossiya bilan emas, balki Amerika va boshqa global hamkorlar bilan yaqinroq hamkorlik qilishi lozim. Biz nafaqat Ukraina, balki butun Yevropa uchun kuchli pozitsiyalarni ta’minlash maqsadida o‘z diplomatiyamiz va xalqaro aloqalarimizni tayyorlamoqdamiz, dedi siyosatchi.
♦ Ukrainaning urushni tugatish shartlari
Ukraina qo‘shinlarni 1991-yil chegaralariga olib chiqishni nazarda tutuvchi “tinchlik formulasi”ni amalga oshirishni talab qilmoqda. Gap 2014 va 2022-yillarda Rossiya tomonidan u yerda o‘tkazilgan “referendumlar” va Ukrainaning Qrim, Donetsk, Lugansk, Xerson va Zaporojye viloyatlari noqonuniy anneksiya qilingani haqida ketmoqda. Moskva “tinchlik formulasi” asosida muzokaralar olib borish imkoniyatini istisno qiladi.
♦ Rossiya shartlari
Putin o‘t ochishni to‘xtatish uchun o‘z shartlarini ilgari surdi, jumladan, Ukraina qo‘shinlari o‘zini o‘zi mustaqil deb e’lon qilingan DXR, LXR, Xerson va Zaporojye viloyatlaridan olib chiqilishi, ushbu to‘rtta hudud va Qrim go‘yoki xalqaro miqyosda Rossiyaning bir qismi sifatida tan olinishi, Ukrainaning NATOga a’zolikdan voz kechishi va sanksiyalarni olib tashlash. Zelenskiy bu taklifni “ishonib bo‘lmaydigan” ultimatum deb atadi.
Izoh (0)