Rossiya qo‘shinlari kirib kelganidan ikki yil o‘tib Ukraina iqtisodiyotini tiklash uchun Jahon banki, BMT, Yevropa komissiyasi va Ukraina hukumati prognozlariga ko‘ra, 486 milliard dollar kerak bo‘ladi. Bir yil avval ehtiyojlar 411 milliard dollarga baholangan edi.
2024-yilda Ukraina hukumatiga rekonstruksiya va restavratsiya bo‘yicha eng asosiy vazifalarni hal qilish uchun 15 milliard dollar kerak bo‘ladi. Bu mablag‘ning bor-yo‘g‘i 5,5 milliard dollari Kiyev va uning xalqaro hamkorlari tomonidan taqdim etilgan.
Hisob-kitoblarga ko‘ra, o‘n yil ichida 486 milliard dollar zarur. Mablag‘ning 17 foizi uy-joy qurilishiga, 15 foizi transportga, 14 foizi savdo va sanoatga, 12 foizi qishloq xo‘jaligiga, 10 foizi energetikaga yo‘naltirilishi kerak. Barcha tarmoqlardagi chiqindilarni tozalash uchun 11 milliard dollar talab qilinadi.
Janglardan ko‘rilgan to‘g‘ridan to‘g‘ri zarar 152 milliard dollarga baholanmoqda.Uy-joy kommunal xo‘jaligi, transport, savdo, sanoat, energetika va qishloq xo‘jaligi eng ko‘p zarar ko‘rgan tarmoqlardir. Eng katta zarar, BMTning press-relizida qayd etilganidek, Kiyev, Donbass, Xerson va Zaporojyeda kuzatilgan.
Uy-joy fondining 10 foizi vayron bo'lgan yoki buzilgan; Kaxovskaya GESining vayron bo‘lishi atrof-muhit va qishloq xo‘jaligi uchun jiddiy salbiy oqibatlarga olib keldi.
Ukraina bosh vaziri Denis Shmigalning aytishicha, mamlakatni tiklash uchun “G‘arbda muzlatilgan Rossiya aktivlarini musodara qilish kerak”. Bu haqda uning BMT saytidagi prognozga izohida aytiladi.
Shmigal hukumat tomonidan xususiy sarmoyani jalb qilish uchun sharoit yaratilayotganini ham ta’kidladi. Kreml avvalroq G‘arb Rossiya mablag‘larini musodara qilishni qonuniylashtira olmasligini aytgan edi. Prezident matbuot kotibi Dmitriy Peskov aktivlarni blokirovka qilishni “qaroqchilik” deb baholagan.
Izoh (0)