O‘zbekistonning qaysi hududida aholi eng zich joylashgani ma’lum qilindi.
Statistika agentligining dastlabki ma’lumotlariga ko‘ra, O‘zbekiston Respublikasida 2025-yil 1-yanvar holatiga bir kvadrat kilometrga o‘rtacha 86,6 kishi to‘g‘ri kelmoqda. Bu esa o‘tgan yilning mos davriga nisbatan solishtirilganda 1,6 kishiga ko‘paygan.
Hududlar kesimida bir kvadrat kilometrga to‘g‘ri keladigan aholi soni:
- Qoraqalpog‘iston R. – 12,2 kishi
- Andijon viloyati – 804,9 kishi
- Buxoro viloyati – 51,6 kishi
- Jizzax viloyati – 72,5 kishi
- Qashqadaryo viloyati – 127,4 kishi
- Navoiy viloyati – 9,9 kishi
- Namangan viloyati – 420,9 kishi
- Samarqand viloyati – 256,3 kishi
- Surxondaryo viloyati – 146,5 kishi
- Sirdaryo viloyati – 217,5 kishi
- Toshkent viloyati – 205,3 kishi
- Farg‘ona viloyati – 613,1 kishi
- Xorazm viloyati – 335,9 kishi
- Toshkent shahri – 6 948,1 kishi.
Tug‘ilish statistikasi
2024-yilda O‘zbekistonda 926,4 ming nafar bola tug‘ilgan. Shundan 479,5 ming nafari o‘g‘il, qolgan 446,9 ming nafari qizlar. Mamlakatda 2018-yildan beri birinchi marta tug‘ilishning yillik o‘sishi to‘xtagan. O‘tgan yilda tug‘ilganlar soni nafaqat 2023-yil, balki 2022-yil ko‘rsatkichidan ham past bo‘lgan.
Tug‘ilishning kamayishi respublikaning barcha hududlarini qamrab olgan. Garchi shiddat bilan qisqarayotganiga qaramay, eng yuqori tug‘ilish darajasi Surxondaryoda, eng kam tug‘ilish Qoraqalpog‘istonda. Shaharlarda tug‘ilish qishloqlardan ko‘ra tezroq qisqarmoqda. Xususan, 2023-yilda shaharlarda 480,2 ming bola tug‘ilgan bo‘lsa, 2024-yilda bu ko‘rsatkich 454,5 mingtagacha keskin qisqargan. Qishloqlarda esa 2023-yilda 481,8 ming, o‘tgan yili 471,9 ming chaqaloq dunyoga kelgan.
Nikohlar va ajrashishlar
2024-yilda O‘zbekistonda 271,8 mingta nikoh qayd etilgan. Bu kamida 15 yillik minimum ko‘rsatkich hisoblanadi. Hatto 2010-yilda ham 292,3 ming nikoh ro‘yxatga olingan. Yaʼni nikohlar aholi soniga mutanosib ravishda o‘smagan.
O‘tgan yil mobaynida nikoh tuzganlarning 136,7 ming nafari (50,3 foiz) shaharlarda, 135,1 ming nafari (49,7 foiz) qishloq joylarida yashovchilar bo‘lgan.
O‘tgan yili nikohlanuvchilarning o‘rtacha yoshi oshishda davom etgan. Yaʼni erkaklarda 27,1 yosh, ayollarda 22,3 yoshga yetgan (2023-yilga nisbatan 0,1 yoshga yuqorilagan).
Nikohlar sonining eng ko‘p ulushi Samarqand (31,4 mingta), Qashqadaryo (29,2 mingta), Farg‘ona (29,2 ming ta) viloyatlari hissasiga to‘g‘ri kelgan.
Aholi soni eng ko‘p va kam bo‘lgan hududlar
Namangan shahri aholi soni ko‘pligi bo‘yicha peshqadam — 713,4 ming kishi. Keyingi o‘rinda esa Samarqand shahri turibdi — 595,8 ming kishi. Bundan tashqari:
- Urgut tumani — 572,6 ming kishi
- Andijon shahri — 492,4 ming kishi
- Denov tumani — 430,5 ming kishi
- Olmazor tumani — 412,0 ming kishi
- Pastdarg‘om tumani — 392,1 ming kishi
- Yunusobod tumani — 385,2 ming kishi
- Shayhontohur tumani — 369,9 ming kishi
- Asaka tumani — 362,1 ming kishi
Aholi eng kam bo‘lgan hududlar reytingida esa G‘ozg‘on peshqadam — 9,3 ming kishi. Keyin o‘rinlarda Tomdi (15,3 ming kishi) va Shirin shaharlari joy olgan (19,4 ming kishi).
Shuningdek:
- Qorovulbozor tumani — 20,3 ming kishi
- Bo‘zatov tumani — 21,9 ming kishi
- Yangiobod tumani — 30,2 ming kishi
- Mo‘ynoq tumani — 33,9 ming kishi
- Konimex tumani — 37,2 ming kishi
- Taxtako‘pir tumani — 38,9 ming kishi
- Uchquduq tumani — 39,7 ming kishi
Izoh (0)