Prezident Shavkat Mirziyoyev boshchiligida olimpiya va paralimpiya harakati, ixtisoslashtirilgan va ommaviy sportni yangi bosqichga olib chiqish hamda aholi jismoniy faolligini oshirish chora-tadbirlari bo‘yicha videoselektor yig‘ilishi o‘tkazildi. Davlat rahbari paralimpiya chempioni Asila Mirzayorova bilan muloqot qildi.
“Asila qizimni ko‘rganimdan juda xursandman. Qizim, baxtli bo‘lgin. Yaqinda to‘ylaringni eshitib, vakilimni yubordim. Sizlarga baxt-saodat tilayman. Eng ishonchli, mardona, mard qizlarimdan birisan. Hammaga qahramon qizim bor, deb aytganman. Senga ham telefonda qahramon qizim deganman. Ilohim, baxtli bo‘linglar. Sizlarning baxt-u kamollaringni ko‘rish hammamizga nasib qilsin. Qizim, ishlaringda muvaffaqiyat. Kelajakda O‘zbekistonga shoda-shoda medallar olib kelishingga ishonaman”, dedi prezident.
Asila Mirzayorova davlat rahbari tabriklarini yetkazishganini aytdi.
“Oilaviy minnatdor bo‘ldik. Los-Anjelesda bo‘lib o‘tadigan Paralimpiya o‘yinlariga kuchli tayyorgarlik ko‘rishni maqsad qilib qo‘yganman. Turmush o‘rtog‘im bilan birga sport sohasidamiz. Ular ham sport murabbiyi hisoblanadi”, dedi sportchi.
Davlat rahbari Asilaning turmush o‘rtog‘i murabbiy bo‘lganidan xursandligini taʼkidladi.
“Baxtingizni topib, murabbiyingiz bilan turmush qurganlaring, qadrli oilasizlar. Ilohim turmushlaring mustahkam bo‘lib, Yangi O‘zbekistonning yangi oilasi va yangi qahramonlar paydo bo‘lishiga ishonaman”, dedi prezident.
Asila, o‘z navbatida, Los-Anjelesda bo‘lib o‘tadigan Paralimpiya o‘yinlarida bitta oltinni ikkita qilishga vaʼda berdi.
Asila Mirzayorova yengil atletika bo‘yicha Tokio—2020 kumush medali, Parij—2024 oltin medali sohibi hisoblanadi. Shuningdek, Mirzayorova hisobida ikkita jahon chempionligi ham mavjud.
“Daryo” 2023-yilda Asila Mirzayorova bilan suhbat qilgan edi. Unda Asila hayotidagi qiyinchiliklar, sportga kirib kelishi va qisqa muddatda ko‘zga ko‘rinarli natijalarga erishgani haqida gapirib o‘tgan edi.
“Oromgohdagi voqeadan keyin hayotimda kutilmagan vaziyat bo‘lgan. Albatta, qiyinchiliklar bo‘lgan, yolg‘izlanib qolganman. Avval ko‘p sport turlariga qiziqqanman, undan keyin esa nima qilish haqida ko‘p o‘yladim. Oilam bilan birgalikda bu qiyinchiliklarni yengib o‘tdik, Sekin-sekin yillar davomida ko‘nikishni boshladim. Shundan so‘ng yana sportga qaytdim.
Sport menga hamma narsani berdi. Birinchi navbatda, umidsizlikka tushishdan qutqargan. O‘zimga bo‘lgan ishonchni qaytargan. Oldingiga nisbatan ancha ruhiy holatimni tiklab olganman. Sportning menga bergan eng katta narsasi shu”, degan edi Asila.
Izoh (0)