Oliy Majlis qonunchilik palatasining 13-fevraldagi majlisida parrandachilik sohasini rivojlantirish, bolalar sog‘lomlashtirish oromgohlarining faoliyatini yanada qo‘llab-quvvatlashga qaratilgan qonun loyihasi birinchi o‘qishda muhokama qilinib, konseptual jihatdan qabul qilindi.
-UeBuvMpV.jpg)
Mazkur qonun loyihasi bilan 2030-yil 1-yanvarga qadar parrandachilik mahsulotlari ishlab chiqaruvchi tadbirkorlik subyektlari yuridik shaxslardan olinadigan yer solig‘ini (ekin maydonlaridan tashqari) to‘lashdan ozod etish belgilanmoqda.
2027-yil 1-yanvarga qadar bo‘lgan davrda esa O‘zbekiston Kasaba uyushmalari federatsiyasi tizimidagi statsionar bolalar sog‘lomlashtirish oromgohlari bino-inshootlari va yer uchastkalarini ijaraga berishdan olgan daromadlari bo‘yicha foyda solig‘i, shuningdek, ijaraga berilgan obyektlari va ular egallagan yer uchastkalari bo‘yicha yuridik shaxslarning mol-mulkiga solinadigan soliqni va yuridik shaxslardan olinadigan yer solig‘ini to‘lashdan ozod etilishi nazarda tutilyapti.
Deputatlarning qayd etilishicha, ushbu qonun loyihasining qabul qilinishi parrandachilik korxonalari faoliyatini yanada qo‘llab-quvvatlash, bolalarga yaratiladigan shart-sharoitlarni yaxshilash, bolalarni sog‘lomlashtirish va aqliy rivojlantirish bo‘yicha ishlar samaradorligini oshirishga xizmat qiladi.
Shavkat Mirziyoyev 2024-yil iyunida chorvachilik tarmoqlarini rivojlantirish bo‘yicha takliflar taqdimoti bilan tanishganda parrandachilik sohasini rivojini qo‘llab-quvvatlash bo‘yicha qo‘shimcha imkoniyatlar ham belgilandi. Parrandachilik korxonalari 5 yilga yer solig‘idan ozod qilinishi, parranda go‘shti eksportiga ruxsat berilishi aytilgandi.
O‘zbekistonda 2025-yil 1-apreldan “Parranda boqish – daromad topish” loyihasi amalga oshiriladi. Parrandachilik sohasida aholi xonadonlari bilan kooperatsiya asosida ishlash tizimini moliyalashtirish uchun 2025-yil 1-fevralga qadar Tiklanish va taraqqiyot jamg‘armasining 50 million AQSH dollari miqdoridagi mablag‘lari “Mikrokreditbank” ATBning ustav kapitalini oshirishga yo‘naltiriladi.
Izoh (0)