Germaniya qurolli kuchlari ukrainalik askarlar o‘qitilayotgan harbiy baza ustida aniqlangan shubhali dronlar bo‘yicha tergov boshladi. Der Spiegel nashriga ko‘ra, gap Shvesingdagi harbiy-havo kuchlari bazasi haqida bormoqda.
Shvesingdagi havo kuchlari bazasi. 2012-yil
Bu haqda birinchilardan bo‘lib yozgan Süddeutsche Zeitung gazetasining Bundesver ichki hisobotiga tayanib xabar berishicha, yanvar oyida mazkur baza ustida olti marta noma’lum dronlar kuzatilgan. Germaniya armiyasi maxsus elektron urush qurollaridan foydalanishiga qaramay, ularni qo‘ndirish yoki boshqaruvchini aniqlashning imkoni bo‘lmagan. Bu esa, o‘z navbatida, Bundesverning mudofaa choralari haqida ayrim savollarni paydo qilgan.
Mamlakat kazarmalari va harbiy sanoat korxonalari ustida dronlar aniqlanishi yangilik emas. Bunday holatlar tez-tez yuz berib turadi. Germaniya rasmiylari, shuningdek, mutaxassislar buning ortida Rossiya turganiga ishonishadi.
Shvesingdagi baza strategik obyektlardan biridir. Boisi Germaniya, Kiyevning eng qalin ittifoqchilaridan biri o‘laroq, ukrainalik askarlarni Patriot havo mudofaa tizimlarini boshqarishga o‘qitadi. Ayni shu sabab ham Ukraina bilan keng ko‘lamli urush olib borayotgan Rossiya gumonlanuvchilar ro‘yxatida birinchi o‘rinni band etgan.
Germaniya Ukrainaning Qo‘shma Shtatlardan so‘ng eng yirik donori hisoblanadi. Mamlakat ittifoqchisiga birgina 2024-yilning o‘zida 7,1 milliard yevro harbiy yordam ko‘rsatgan. U Patriot, IRIS-T havo mudofaa tizimlari, Leopard 2 tanklari va boshqalarni o‘z ichiga oladi.
Izoh (0)