Rossiya Ukrainaga ikkinchi “Oreshnik” ballistik raketasini uchirgan bo‘lishi mumkin, ammo u Rossiya hududida portladi. Bu haqda Forbes xabar berdi.
“Oreshnik”ning birinchi parvozidan uch oy o‘tgach, Rossiya 6-fevral kuni ballisti raketa bilan Kiyevni nishonga olishni rejalashtirgan. Harbiy muxbir Kirill Sazonov ta’kidlashicha, “Oreshnik” nishonga yetib bormasdan, ishdan chiqib, portlagan.
Rossiya prezidenti Vladimir Putin “Oreshnik”ning ilk parvozlaridan so‘ng Kiyevdagi “qaror qabul qilish markazlari”, jumladan, Zelenskiy ofisini nishonga olish bilan tahdid qilgandi. Ammo ikkinchi parvozning muvaffaqiyatsizligi Rossiya uchun og‘ir zarba bo‘ldi.
Garchi “Oreshnik”ning ikkinchi muvaffaqiyatsiz uchirilishini tasdiqlashning hozircha iloji bo‘lmasa-da, bu ehtimoldan yiroq emas, deydi jurnalistlar.
Xabarlarga ko‘ra, “Oreshnik”ning muvaffaqiyatsizlikka uchragan ikkinchi parvozi nafaqat kiyevliklar va Ukraina rahbarlarini boshpanalardagi tahlikali kutishdan xalos etdi, balki Kreml uchun ham teskari ta’sir ko‘rsatdi. Chunki yadro kallaklari bilan jihozlangan qit’alararo ballistik raketaga o‘xshash “Oreshnik” raketasi harbiy ta’sirdan ko‘ra ko‘proq vahima uyg‘otgandi.
“Oreshnik” RS-26 ning qisqaroq masofa qamroviga ega modifikatsiyasidir. 2011-yilda RS-26 ning ilk sinovi “portlash bilan sharmandali tarzda” yakunlandi, chunki raketa belgilangan yo‘nalishdan chetga chiqib, Plesetsk kosmodromidagi uchirish joyidan bir necha kilometr narida portlab ketgandi.
Izoh (0)