Ukraina armiyasi 6-fevral kuni Rossiyaning Kursk viloyatida boshlangan hujumlari davomida kamida bitta aholi punktini nazorat ostiga olishga erishdi va Suja shahridan janubi-sharqda 5 kilometrgacha ichkariga kirib bordi. Bu haqda Amerikaning Urushni o‘rganish instituti (ISW) kundalik hisobotida ma’lum qildi.
Ekspertlar ta’kidlashicha, Ukraina harbiylari “Maxnovkadan janubi-g‘arbga (Sujadan janubi-sharqqa) va Suja-Oboyyan yo‘li bo‘ylab Cherkasskaya Konopelkadan shimol va sharqqa siljishgan hamda Kolmakovni qo‘lga kiritishgan”.
Shuningdek, Cherkasskaya Konopelka va Fanaseyevka qishloqlarida Ukraina kuchlari borligi qayd etilgan, biroq ularning 6-fevralda kun oxirigacha bu hududlarni o‘z nazorati ostida saqlab qolgani aniq emas. Bundan tashqari, Ukraina harbiylarining Ulanok qishlog‘i tomon harakat qilayotgani haqida xabar berilgan.
Kolmakov – Sujaning janubi-sharqidagi qishloq bo‘lib, urushdan oldin u yerda 79 kishi istiqomat qilgan.
Rossiyalik harbiy blogerlar mamlakat harbiylarining katta miqdordagi Ukraina harbiy texnikasini yo‘q qilishga erishganini ta’kidlashsa-da, shu bilan birga Ukraina tomoni erishgan bir qator taktik yutuqlarni ham tasdiqlashmoqda.
Ukraina armiyasi mudofaamizga 5 km ichkarigacha kirib bordi, deb yozadi “Dva mayora” Telegram kanali.
Shuningdek, Ukraina harbiylari Fanaseyevka va Cherkasskaya Konopelkada bo‘lgani qayd etilgan. Rossiya manbalariga ko‘ra, Ukraina harbiylari hujumning “asosiy maqsadiga hozircha erisha olmagan”, chunki ular nisbatan yirik Ulanok qishlog‘iga kira olmagan.
Rossiya Mudofaa vazirligi bir kun oldin Rossiya qo‘shinlari Ukraina armiyasining “Kursk viloyatining Cherkasskaya Konopelka va Ulanok aholi punktlari yo‘nalishidagi qarshi hujum harakatlariga urinishini barbod qilgani” va “barcha hujumlarni qaytargani”ni ma’lum qilgan edi.
Ukraina harbiylari o‘tgan yilning 6-avgustida Kursk viloyatida hujum boshlagan edi. O‘shandan beri Rossiyaning ushbu mintaqasi hududining bir qismi Ukraina Qurolli kuchlari nazorati ostida qolmoqda. Rossiya harbiylari hududning bir qismini qaytarib olishga muvaffaq bo‘lgan bo‘lsa-da, Suj tumani markazi va unga tutash hududlar vaqti-vaqti bilan qarshi hujumga o‘tishga urinayotgan Ukraina harbiylari nazorati ostida qolmoqda.
Ukraina rasmiy vakillari Kursk viloyatidagi operatsiyaning Ukraina pozitsiyalarini mustahkamlashda, jumladan, ehtimoliy tinchlik muzokaralarida muhim ahamiyatga ega ekanligini ta’kidlashmoqda. Operatsiya tanqidchilari esa, Rossiya harbiylarining so‘nggi olti oy ichida Donetsk viloyatida oldinga siljib, bir qator shaharlarni egallab olganini qayd etgan.
Izoh (0)