Kobul aeroportida tartibsizlik va vahima avj olgan. Mahalliy aholi aeroportga bostirib kirishga urinmoqda. Bu haqda Al Arabiya telekanaliga tayanib, “RBK” xabar berdi.
Telekanal aeroport oldidagi maydonda bir necha yuz olomon to‘plangani, ulardan ayrimlari terminalga kirishga urinayotgani aks etgan videoni e’lon qildi. Ba’zi kishilar uchish-qo‘nish yo‘lagiga kirib, uni to‘sib qo‘ygan.
Al Arabiya ta’kidlashicha, diplomatik vakolatxonalar xodimlarini tashiyotgan vertolyotlar qatnovining jadallashishi vahimaga sabab bo‘lgan. Avvalroq bir necha mamlakat diplomatlari Kobulni tark etishi e’lon qilingandi. Ular mamlakatdan poytaxtdagi yagona aeroport orqali chiqib ketishi mumkin.
Telekanal, shuningdek, diplomatik vakolatxonalar xodimlari evakuatsiya qilinayotgan aeroport yaqinida otishma sodir bo‘lganini xabar qilmoqda. CNN Pentagon vakiliga tayanib xabar berishicha, Kobul aeroportida joylashgan AQSh qo‘shinlari “xavfsizlikni buzuvchi hodisalari”ni qayd etgan, ammo jang qilmagan. Mudofaa vazirligi vakilining qo‘shimcha qilishicha, aeroport xavfsizligini ta’minlashda ishtirok etayotgan turk askarlari jangga kirganmi yoki yo‘q, noma’lum.
Tasdiqlanmagan xabarlarga ko‘ra, so‘nggi tijorat reyslari Kobuldan limmo-lim to‘lib uchib ketgan, go‘yoki samolyotlar ko‘tarila olmagani sababli bir necha kishini reysdan tushirishga to‘g‘ri kelgan.
16-avgust kuni ertalab ijtimoiy tarmoqlarda tarqalgan videoda bir necha o‘nlab odamlar samolyot bortiga chiqib olishga urinayotganini ko‘rish mumkin. Ular balandda joylashgan yo‘lovchilar o‘tadigan yo‘lakka osilib chiqmoqda.
https://www.instagram.com/p/CSoAWOhnJMW/?utm_source=ig_embed&ig_rid=5a14ba6c-1c06-4aa8-96d1-8ec1120d9496
Mahalliy jurnalist qo‘lida chamadon ko‘tarib aeroport tomonga yugurayotgan odamlarni videoga olgan. Unda o‘q ovozlari eshitilmoqda.
https://www.instagram.com/p/CSoBN0vjtzC/?utm_source=ig_embed&ig_rid=1b0179a8-60ff-4ca4-81b5-2cd145bd882d
Aeroportni nazorat qilayotgan amerikalik harbiylar harbiy samolyotlardan biriga chiqib olish uchun uchish-qo‘nish yo‘lagiga yugurib o‘tishga urinayotgan afg‘onlarni to‘xtatish maqsadida havoga ogohlantiruvchi o‘q uzgan.
“RIA Novosti” o‘z manbalariga tayanib xabar qilishicha, otishma oqibatida bir necha kishi halok bo‘lgan. The Wall Street Journal kamida uch kishi, Al Arabiya besh kishi halok bo‘lgani haqida yozmoqda. Ta’kidlanishicha, odamlar otishma yoki tiqilinch oqibatida vafot etgani hali aniq emas.
Associated Press xabariga ko‘ra, Kobuldan barcha muntazam reyslar bekor qilingan, faqat harbiy transport va harbiylar tomonidan yollangan yo‘lovchi samolyotlar o‘z ishini davom ettirmoqda, ular yordamida chet el fuqarolari Afg‘onistondan evakuatsiya qilinadi.
“Tijoriy reyslarining to‘xtatilishi ‘Tolibon’ hukmronligidan qo‘rqqan afg‘onlar uchun mamlakatdan qochishning oxirgi yo‘llaridan birini to‘sib qo‘ydi”, — deb yozadi agentlik.
Flightradar 24 xizmati xabariga ko‘ra, hozir Kobul aeroportida Amerikaning Lockheed KC-130J Hercules harbiy samolyoti turibdi. G‘arb matbuoti yozishicha, Vashington Afg‘onistondan bir necha yuz diplomatik xodimlarini evakuatsiya qilish niyatida.
Xabarlarga ko‘ra, amerikalik diplomatlarni, NATO diplomatik vakolatxonalari xodimlarini, shuningdek, “Tolibon”ga qarshi kurashda G‘arbga yordam bergan afg‘on fuqarolarini evakuatsiya qilishda AQShning kamida 78 ta harbiy samolyoti ishtirok etmoqda.
Bundan tashqari, operatsiyaga 10 ta Britaniya va 4 ta Kanada samolyoti jalb qilingan. Yaqin soatlarda Germaniya va Ispaniya samolyotlari kelishi kutilmoqda.
Qayd etilishicha, aeroport respublikadagi “Tolibon” nazorati o‘rnatilmagan yagona joy. Ammo, G‘arb matbuoti xabariga ko‘ra, Kobuldan aeroportga olib boradigan yo‘lda jangarilar boshqaruvidagi yo‘ltanlamas armiya mashinalari ko‘rinib turadi, vaqti-vaqti bilan o‘q ovozlari eshitiladi, vertolyotlar osmonda patrullik qiladi.
Kobul aeroportini NATO harbiylari va afg‘on armiyasi qo‘riqlamoqda.
Pentagon matbuot kotibi Jon Kirbi “TASS”ga bergan intervyusida Kobul xalqaro aeroporti tijoriy reyslarni qabul qilishni davom ettirayotganini ma’lum qildi. Uning so‘zlariga ko‘ra, u yerdagi AQSh harbiylari havo harakatini boshqarishni o‘z qo‘liga olgan.
“AQSh kuchlari hozirda afg‘onistonlik hamkasblari ko‘magida aeroportda havo harakatini boshqarish mas’uliyatini o‘z zimmasiga oldi. Vaqti-vaqti bilan uzilishlar va kechikishlar bo‘lsa-da, tijoriy reyslar davom etmoqda ”, — dedi u.
“Biz aeroportdagi tartib va tadbirlarni, shu jumladan, odamlarni ketishga tayyorlashni takomillashtirishni davom ettirmoqdamiz. Shu bilan birga, biz aeroportni himoya qilish choralarini kuchaytirmoqdamiz ”, — deb qo‘shimcha qildi Kirbi.
Agens France-Presse agentligining xabar berishicha, tinch aholini Afg‘onistondan evakuatsiya qilish bo‘yicha tartibni ta’minlayotgan AQSh armiyasi olomon aerodromga bostirib kirganidan keyin havoga ogohlantiruvchi o‘q uza boshlagan.
“Juda qo‘rqib ketyapman. Ular havoga o‘q uzmoqda. Bir qizning yugurib ketayotganini ko‘rgandim, u o‘ldi”, — deya hodisa guvohlaridan birining so‘zlarini keltirdi agentlik.
16-avgust kuni ertalab Kobul aeroporti yaqinida qo‘lida qurol ushlagan “Tolibon” jangarilarini ko‘rishgan.
Izoh (0)