Qo‘shma Shtatlar “Tolibon” hokimiyatga kelgan vaqti afg‘on uchuvchilari tomonidan O‘zbekistonga olib o‘tilgan vertolyotlarning bir qismini qaytardi. Bu haqda “Amerika ovozi” telekanali O‘zbekistonning Vashingtondagi elchixonasida o‘tgan tadbirda qatnashgan Pentagon rasmiylariga tayanib xabar berdi.
“Tolibon”dan qochgan afg‘on uchuvchilari O‘zbekistonga olib o‘tgan Amerika samolyot va vertolyotlarining aksariyat qismi respublikaga berilgan. Pentagon yaroqli deb topgan texnik vositalardan yettitasi – Black Hawk vertolyotlari hozirda AQSHga qaytarilgan, deya ma’lum qildi telekanal muxbiri Navbahor Imamova.
Tadbirda, shuningdek O‘zbekistonning AQSH va Kanadadagi elchisi Furqat Sidiqov so‘zga chiqib, Toshkent Vashington bilan har sohada hamkorlikni oshirishga tayyorligini ma‘lum qildi. Bundan tashqari, O‘zbekiston hukumati ikki davlat xavfsizlik tizimlari va qurolli kuchlari o‘rtasidagi hamkorlikni qadrlashi ta’kidlangan.
Ma'lumot uchun, 2021-yilning avgust oyida afg‘on harbiylari tomonidan O‘zbekiston hududiga Embraer EMB 314 Super Tucano va Pilatus PC-12 rusumdagi 22 ta harbiy samolyot va UH-60 Black Hawk, MD-530 va Mi-17 rusumdagi 24 ta vertolyot olib o‘tilgan edi.
Tolibon O‘zbekiston hukumatidan ularni qaytarishni bir necha bor so‘ragan. Biroq keyinroq Toshkent va Vashington harbiy texnikalar taqdiri bo‘yicha kelishuvga erishgani, ular O‘zbekistonda qolishi ma‘lum qilingandi.
