Meta korporatsiyasi AQSH prezidenti Donald Tramp bilan sud nizosini hal qilish uchun 25 million dollar to‘lashga rozi bo‘ldi.
Nizo 2021-yil 6-yanvardagi Kapitoliyga hujumdan so‘ng Trampning Facebook va Instagram ijtimoiy tarmoqlaridagi akkauntlari bloklangani sababli yuzaga kelgan.
The Wall Street Journal’ning xabar qilishicha, kelishuv shartlariga binoan 22 million dollar prezident kutubxonasi jamg‘armasiga yo‘naltiriladi, qolgan mablag‘ esa sud xarajatlarini qoplashga sarflanadi. Nashrning ta’kidlashicha, korporatsiya o‘z aybini oshkora tan olmayapti.
Amerika OAVlariga ko‘ra, kompaniya rahbari Mark Sukerberg so‘nggi paytlarda o‘z korporatsiyasini yangi ma’muriyat tomonidan bo‘lishi mumkin bo‘lgan tazyiqdan himoya qilish maqsadida Tramp bilan munosabatlarni yaxshilashga urinmoqda. Meta avvalroq Vashington konservatorlari tomonidan demokratlar foydasiga noxolislikda ayblangan va ularning tanqidiga duchor bo‘lgan.
Joriy yilning 29-yanvar kuni investorlar bilan suhbat paytida Meta asoschisi Tramp ma’muriyatiga Amerika texnologiya kompaniyalarini qo‘llab-quvvatlagani va “qadriyatlarni himoya qilgani” uchun minnatdorchilik bildirgan. Milliarder so‘zlariga qo‘shimcha qilib “bu yil hukumatlar bilan munosabatlarni qayta ko‘rib chiqish uchun muhim yil bo‘lishi”ni ta’kidlagan.
2024-yil dekabr oyida Meta, shuningdek, Trampning inauguratsiya fondiga 1 million dollar yo‘naltirgan. WSJ ushbu xayr-ehsonni “Sukerberg va uning kompaniyasining o‘tmishdagi amaliyotidan chekinish” deb atagan.
2024-yilning noyabr oyida ham Sukerberg Trampning Floridadagi Mar-a-Lagodagi uyiga tashrif buyurib, bo‘lajak prezident bilan munosabatlarni yo‘lga qo‘yishga harakat qilgan. Ayrim ma’lumotlarga ko‘ra, kechki ovqat paytida Tramp sud jarayoni mavzusiga to‘xtalib, uni hal qilishga urinib ko‘rishni taklif qilgan. Bu taklif tomonlar o‘rtasida ikki oylik muzokaralarning boshlanishiga turtki bo‘lgan.
Trampning Facebook, Instagram, Twitter (X) va YouTube’dagi akkauntlari 2021-yil boshida bloklangan, o‘sha yilning iyul oyida u ijtimoiy tarmoqlar rahbariyatini sudga bergan. Twitter’ga qarshi ayblovlar rad etilgan, YouTube’ga egalik qiluvchi Google korporatsiyasiga qarshi da’vo ishi esa 2023-yilda yopilgan.
Siyosatchining Twitter akkaunti 2022-yilda, boshqa ijtimoiy tarmoqlardagi akkauntlari esa 2023-yilda tiklangan. 2022-yil fevral oyida bloklash tufayli Tramp o‘zining Truth Social ijtimoiy tarmog‘ini ishga tushirgan.
2021-yil yanvar oyida Kapitoliyga hujum
Prezidentlik saylovlarida mag‘lub bo‘lgan Donald Tramp tarafdorlari 2021-yil 6-yanvar kuni ovoz berish natijalarini tasdiqlash vaqtida Kongress binosi oldida g‘alayon ko‘tardi. Namoyishchilar binoga bostirib kirdi, Kongressdagi muhokamalar bir necha soatga to‘xtatildi va qonun chiqaruvchilar evakuatsiya qilindi. Politsiya hujum ishtirokchilariga qarshi ko‘zdan yosh oqizuvchi gaz ishlatgan, AQSH Milliy gvardiyasi Vashingtonga yetib kelgan.
Norozilik paytida besh kishi halok bo‘lgan, 50 ga yaqin kishi qo‘lga olingan, ularning ba’zilariga ayblov e’lon qilindi. Hujumning yuzlab ishtirokchilari turli muddatlarga qamoq jazosiga hukm qilingan. Tergovchilar fikricha, namoyishning asosiy ishtirokchilari Proud Boys va Oath Keepers tashkilotlari bo‘lgan.
Kapitoliyga bostirib kirish ishida jami 1 230 dan ortiq kishi ishtirok etmoqda, ular orasida Donald Tramp ham bo‘lgan.
Izoh (0)