AQShning Markaziy razvedka boshqarmasi (MRB) xodimlari 1960-yilda kubalik siyosatchi Raul Kastroga suiqasd uyushtirishni rejalashtirgan. Bu haqda Amerika maxsus xizmatining oshkor qilgan hujjatlariga tayanib, Jorj Vashington universiteti qoshidagi Milliy xavfsizlik arxivi xabar berdi, deb yozmoqda “TASS”.
Arxivning ma’lumot berishicha, gap Kuba inqilobining yetakchilariga uyushtirilgan birinchi suiqasd haqida ketmoqda. “Markaziy razvedka boshqarmasining Kuba inqilobi rahbarlarini yo‘q qilishga qaratilgan dastlabki fitnasi doirasida agentlikning yuqori lavozimli rasmiylari Raul Kastro Pragadan Gavanaga uchib kelayotgan samolyotning uchuvchisiga suiqasdni amalga oshirish uchun 10 ming dollar mukofot taklif qilgan”, — deyiladi xabarda.
MRB rejasiga ko‘ra, avvalroq Kubada MRBning agenti sifatida yollangan uchuvchi Xose Raul Martines 1960-yilning iyul oyida parvoz vaqtida “halokat uyushtirishi” kerak edi. Martines o‘lgan taqdirda, u Amerika maxsus xizmatlaridan “ikki nafar o‘g‘lining oliy ma’lumot olishiga yorda berishi”ni so‘ragan. Oshkor qilingan hujjatlarga ko‘ra, “Martinesga shunday va’da berilgan”, — degan uning Gavanadagi kuratori Uilyam Myurrey.
U Martines bilan aeroport yo‘lida, Pragaga uchish, u yerdan Gavanaga Kastro va Kubaning boshqa rahbarlari bo‘lgan samolyot boshqaruvida qaytib kelish rejasining tafsilotlarini muhokama qilgan. Myurreyning Vashingtondagi rahbariyatiga xabar berishicha, Martines parvoz vaqtida texnik nosozliklarni yuzaga chiqarib, samolyotni qulatishga tayyor edi, lekin “yong‘in natijasida boshqa yo‘lovchilar yoki ekipajni qutqara olmaslik xavfi tufayli ... dvigatelning ishlamay qolishi” variantini istisno qilgan. “U samolyotdagi boshqa yo‘lovchilarning hayotini xavf ostiga qo‘ymasdan halokatni amalga oshirishga shubha qilmoqda”, — deb yozgan Myurrey Lengliga yuborgan telegrafida.
Martines Pragaga uchib ketganidan keyin Myurrey Vashingtondan rejani bekor qilish to‘g‘risida ko‘rsatma olgan, lekin u payti uchuvchi bilan bog‘lanishning imkoniyati yo‘q edi. Martines Gavanaga qaytganida Myurreyga “baxtsiz hodisani uyushtirishning imkoniyati bo‘lmagani” haqida xabar bergan.
Milliy xavfsizlik arxivining ma’lumotlariga ko‘ra, bir necha haftadan keyin, 1960-yilning avgust oyida MRB Fidel Kastroga suiqasd uyushtirishga uringan.
Ma’lumot uchun, Kubaning hukmron Kommunistik partiyasi rahbari Raul Kastro iste’foga chiqishini e’lon qildi. Xabarga ko‘ra, Kastro Kommunistik partiyaning 8-syezdida so‘zga chiqib, mamlakat boshqaruvini Kuba Vazirlar Kengashi rahbari Migel Dias Kaneldan iborat o‘nlab yillik tajribalar bilan chiniqib, yaxshi tayyorgarlikdan o‘tgan rahbarlar guruhiga topshirayotganidan mamnunligini aytdi.
Izoh (0)