BMT Xavfsizlik kengashi Falastinlik qochqinlarga yordam berish bo‘yicha Yaqin Sharq agentligining (UNRWA) ishini muhokama qildi. AQSH Isroil knessetining (parlament) Sharqiy Quddusdagi UNRWA ofislarini yopish va Isroil hududida agentlik faoliyatini taqiqlash to‘g‘risidagi qarorini qo‘llab-quvvatladi.
BMT vakillari Knesset qarorini “halokatli” deb atamoqda.
Isroil hukumati UNRWA’ni HAMAS bilan yaqin aloqada bo‘lishda va agentlikning 19 nafar xodimi 2023-yil 7-oktyabrdagi hujumlarda ishtirok etganlikda ayblamoqda. 2024-yilda agentlikning to‘qqiz nafar xodimi ishdan bo‘shatildi, ko‘plab davlatlar, shu jumladan, AQSH ham agentlikni moliyalashtirishni to‘xtatgan edi.
Agentlik rahbari yuz minglab muhtoj falastinliklar uchun UNRWA yashash uchun zarur bo‘lgan hamma narsaning asosiy manbayi ekanligini ta’kidladi.
Knesset qonunining to‘liq amalga oshirilishi fojia bo‘ladi. Bu insonparvarlik yordamini yetkazib berish sezilarli darajada ko‘payishi kerak bo‘lgan bir paytda BMT ishiga to‘siq bo‘ladi. Bu millionlab falastinliklarning shundoq ham fojiali turmush sharoitini yanada yomonlashtiradi, dedi BMTda so‘zga chiqqan UNRWA rahbari Filipp Lazzarini.
Isroilning BMTdagi doimiy vakili Denni Dennon BMT yig‘ilishida o‘z hukumatining qarorini tushuntirdi.
Bu qaror osonlikcha yoki shoshilinch tarzda qabul qilinmadi. Bu siyosiy qaror emas edi. Bu agentlik tomonidan siyosiy mulohazalar, e’tiborsizlik va yashirishni insonparvarlik tamoyillaridan ustun qo‘ygan o‘n yilliklar davomidagi xiyonatning natijasidir, dedi Denni Denon.
Uning qo‘shimcha qilishicha, qaror “UNRWA HAMAS va boshqa terrorchi tashkilotlarning o‘z saflariga chuqur kirib borishini aniqlashdan doimo bosh tortgani” uchun qabul qilingan.
Falastin vakili Riyad Mansur Isroil shunchaki falastinlik qochqinlardan butunlay qutulish uchun UNRWA ishini to‘xtatishga urinayotganini aytdi.
Isroil 7-oktyabrgacha ham UNRWA’ga hujum qilgan. Ular qochoqlar muammosini yopishni, bekor qilinishi mumkin bo‘lmagan, ajralmas huquqlarni butunlay yo‘q qilishni xohlashdi. G‘oya oddiy: qochqinlardan qutulish uchun ularga xizmat ko‘rsatuvchi agentlikni yo‘q qilishga harakat qilish kerak. Agar ta’lim, sog‘liqni saqlash bo‘lmasa, yordam bo‘lmasa, qochqinlar taslim bo‘ladi, ular ketishadi, ular o‘z yerlarini va ozodlik hamda qaytish orzusini tark etishadi, dedi Falastin muxtoriyatidan doimiy kuzatuvchi Riyad Mansur yig‘ilishda.
AQSH vakili Isroil qarorini qo‘llab-quvvatlashini bildirdi va AQSH pozitsiyasini tushuntirdi.
Biz ozod etilgan isroilliklar asirlikda bo‘lgan vaqtida BMT binolarida saqlanganiga oid xabarlardan tashvishdamiz. Bu juda jiddiy ayblovlarga baho berish uchun to‘liq va mustaqil tekshiruv o‘tkazish nihoyatda muhimdir. Afsuski, bu HAMASning BMT binolaridan, ayniqsa, UNRWA binolaridan foydalangani haqidagi birinchi ayblov emas. 30-yanvar kuni Quddusda joylashgan UNRWA idoralarini yopish Isroilning suveren qarori. Qo‘shma Shtatlar ushbu qarorning amalda bajarilishini qo‘llab-quvvatlaydi, deydi AQSH vakili Doroti Shi.
Izoh (0)