Isroil parlamenti (Knesset) BMTning falastinlik qochqinlarga yordam ko‘rsatish agentligini “terrorchi tashkilot” deb e’lon qilish uchun ovoz bermoqchi. Bu haqda The Jerusalem Post xabar berdi.
“Ushbu qonun loyihasining maqsadi UNRWA’ni terrorchi tashkilot deb e’lon qilish, shuningdek, Isroilning agentlik bilan bevosita yoki bilvosita aloqalarini to‘xtatishga qaratilgan”, — deb yozadi Isroil Beytenu partiyasi deputati Yulia Malinovskaya.
Qonunchilik tashabbusi Xalqaro jinoiy sud va umuman xalqaro hamjamiyat Isroilni G‘azoga insonparvarlik yordamining kirib kelishi va tarqatilishini yetarli darajada ta’minlamagani uchun javobgarlikka tortgan paytda amalga oshirilmoqda.
UNRWA Suriya, Livan, Iordaniyadagi falastinliklar hamda G‘azo va G‘arbiy Sohildagi yana 2,34 milliondan ortiq qochqin uchun xizmat ko‘rsatadi.
Faqat oxirgi 2,34 million falastinlik Knesset uchun ovoz berish jarayonida ahamiyatli, deyiladi xabarda. Qonun loyihasi agar dastlabki ovoz berish yo‘li bilan ma’qullansa, baribir birinchi, ikkinchi va uchinchi o‘qishdan o‘tishi kerak bo‘ladi.
Isroilning UNRWA’ni yopishga bo‘lgan ko‘p yillik istagi G‘azodagi urush bilan kuchaydi. Jumladan, Isroil UNRWA’ning 12 ga yaqin xodimini 7-oktyabr HAMAS boshchiligidagi Isroilga bostirib kirishi chog‘ida fuqarolarni o‘g‘irlashda ishtirok etganlikda ayblamoqda.
Bundan tashqari, UNRWA’ning 190 ga yaqin xodimi HAMAS bilan aloqasi borligi da’vo qilingan. Isroil armiyasi agentlikning G‘azodagi obyektlarida HAMAS qurollari saqlanganini ta’kidlagan.
“Ko‘plab davlatlar, jumladan, AQSH, Germaniya, Kanada, Avstraliya, Italiya, Buyuk Britaniya, Finlyandiya va Ruminiya UNRWA’ni moliyalashtirishni to‘xtatish qarorini e’lon qilgan”, — deydi Malinovskaya.
Izoh (0)