Birlashgan Millatlar Tashkiloti bosh kotibi Antoniu Guterrish Isroil bosh vaziri Binyamin Netanyaxuga maktub yo‘llab, bir kun avval qabul qilingan BMTning Falastinlik qochqinlarga yordam ko‘rsatish agentligi (UNRWA) faoliyatini taqiqlovchi yangi qonunga norozilik bildirdi.
“Men sizni va Isroil hukumatini potensial halokatli oqibatlarning oldini olishga va UNRWA’ga bosib olingan Falastin hududlari, jumladan, Sharqiy Quddusdagi faoliyatini xalqaro huquq doirasida davom ettirishiga ruxsat berishga chaqiraman”, deyiladi Gutterish maktubida.
Uning ta’kidlashicha, “Isroil bosqinchi davlat sifatida” aholining ehtiyojlarini qondirishni ta’minlash uchun mas’ul bo‘lib qolishi kerak.
“Agar Isroil buni uddalay olmasa, u BMTning ushbu maqsadlardagi faoliyati, shu jumladan, UNRWA faoliyatiga ruxsat berishga majburdir”, deya ta’kidlaydi BMT bosh kotibi.
Isroilning cheklov to‘g‘risidagi qonuni 2023-yil 7-oktyabrda HAMASning Isroilga hujumida UNRWA’ning bir necha xodimlari ishtirok etgani haqidagi maʼlumotlar tufayli ishlab chiqilgan.
Ushbu agentlik 2025-yildan Isroildagi faoliyatini to‘liq to‘xtatishi kerak. Qonun loyihasi 28-oktyabr kuni Isroil parlamentida 92 deputat tomonidan ma’qullangan.
AQSH Davlat departamenti Isroilning ushbu qaroridan chuqur xavotir bildirib, G‘azo shimolidagi Jabaliya qochqinlar lageriga gumanitar yordam yetib bormayotganini va Vashington bu holatni qabul qilmayotganini ta’kidlagan.
Buyuk Britaniya tashqi ishlar vaziri Devid Lemmi Isroilning UNRWA’ni taqiqlashga qaratilgan chora-tadbirlaridan chuqur afsusdaligini aytgan.
Germaniya, Fransiya, Buyuk Britaniya, Kanada, Avstraliya, Yaponiya va Janubiy Koreya ham Isroil parlamentining qonun loyihalaridan “chuqur xavotir bildirgan”.
Izoh (0)