Google korporatsiyasi Google. Xaritalar xizmatida amerikalik foydalanuvchilar uchun Meksika ko‘rfazini Amerika ko‘rfazi deb qayta nomlaydi. Bu haqda CNN kompaniya bayonotiga asoslanib xabar berdi.
O‘zgarish Geografik nomlar axborot tizimi (GNIS) — AQSH va uning nazoratidagi hududlarda joylashgan obyektlar haqidagi ma’lumotlar bazasi yangilangandan so‘ng amalga oshiriladi.
Google rasmiy hukumat manbalarida yangilangan nomlarni o‘zgartirish bo‘yicha o‘zining uzoq yillik amaliyotiga rioya qilishini ma’lum qildi.
Joriy yilning 25-yanvar kuni AQSH prezidenti Donald Tramp Meksika ko‘rfazini Amerika ko‘rfazi, Alyaskadagi Denali cho‘qqisini esa Mak-Kinli deb nomlashni buyurdi.
Bu o‘zgarishlar mamlakatning AQSHning noyob merosini asrash va kelajak avlod amerikaliklarga qahramonlarning xotirasini e’zozlash hamda tarixiy qadriyatlarni ulug‘lash imkoniyatini yaratish yo‘lidagi sa’y-harakatlarini tasdiqlaydi, deyiladi AQSH Ichki ishlar vazirligi xabarida.
Google Alyaskadagi Denali cho‘qqisini ham o‘z xaritalarida qayta nomlaydi.
Kompaniyaning ta’kidlashicha, “rasmiy nomlar turli mamlakatlarda farq qiladi, Google Xaritalar foydalanuvchilari rasmiy mahalliy nomni ko‘rishadi”.
Trampning tahdidlari
2024-yil dekabr oyining oxirida Donald Tramp bir necha bayonotlarida AQSHning Panama kanali va Grenlandiya ustidan nazoratni o‘rnatishi “Amerika milliy xavfsizligi” masalasi ekanini ta’kidlagan. 7-yanvarda o‘tkazilgan matbuot anjumanida u Panama kanali va Grenlandiyani qo‘lga kiritish uchun harbiy yoki iqtisodiy bosim o‘tkazish ehtimolini rad etmagan. Shuningdek, Tramp Kanadaga AQSH tarkibiga qo‘shilishni taklif qilgan.
Daniya hukumati dekabr oyida Grenlandiya mudofaasiga ajratiladigan mablag‘ni kamida 1,5 milliard dollarga oshirishini e’lon qildi. Bundan tashqari, qirollik o‘zining rasmiy gerbini o‘zgartirib, unda Grenlandiya va Farer orollari ramzlarini kattalashtirdi.
Izoh (0)