БМТ Хавфсизлик кенгаши Фаластинлик қочқинларга ёрдам бериш бўйича Яқин Шарқ агентлигининг (UNRWA) ишини муҳокама қилди. АҚШ Исроил кнессетининг (парламент) Шарқий Қуддусдаги UNRWA офисларини ёпиш ва Исроил ҳудудида агентлик фаолиятини тақиқлаш тўғрисидаги қарорини қўллаб-қувватлади.
БМТ вакиллари Кнессет қарорини “ҳалокатли” деб атамоқда.
Исроил ҳукумати UNRWA’ни ҲАМАС билан яқин алоқада бўлишда ва агентликнинг 19 нафар ходими 2023 йил 7 октябрдаги ҳужумларда иштирок этганликда айбламоқда. 2024 йилда агентликнинг тўққиз нафар ходими ишдан бўшатилди, кўплаб давлатлар, шу жумладан, АҚШ ҳам агентликни молиялаштиришни тўхтатган эди.
Агентлик раҳбари юз минглаб муҳтож фаластинликлар учун UNRWA яшаш учун зарур бўлган ҳамма нарсанинг асосий манбайи эканлигини таъкидлади.
Кнессет қонунининг тўлиқ амалга оширилиши фожиа бўлади. Бу инсонпарварлик ёрдамини етказиб бериш сезиларли даражада кўпайиши керак бўлган бир пайтда БМТ ишига тўсиқ бўлади. Бу миллионлаб фаластинликларнинг шундоқ ҳам фожиали турмуш шароитини янада ёмонлаштиради, деди БМТда сўзга чиққан UNRWA раҳбари Филипп Лаззарини.
Исроилнинг БМТдаги доимий вакили Дэнни Деннон БМТ йиғилишида ўз ҳукуматининг қарорини тушунтирди.
Бу қарор осонликча ёки шошилинч тарзда қабул қилинмади. Бу сиёсий қарор эмас эди. Бу агентлик томонидан сиёсий мулоҳазалар, эътиборсизлик ва яширишни инсонпарварлик тамойилларидан устун қўйган ўн йилликлар давомидаги хиёнатнинг натижасидир, деди Дэнни Денон.
Унинг қўшимча қилишича, қарор “UNRWA ҲАМАС ва бошқа террорчи ташкилотларнинг ўз сафларига чуқур кириб боришини аниқлашдан доимо бош тортгани” учун қабул қилинган.
Фаластин вакили Рияд Мансур Исроил шунчаки фаластинлик қочқинлардан бутунлай қутулиш учун UNRWA ишини тўхтатишга уринаётганини айтди.
Исроил 7 октябргача ҳам UNRWA’га ҳужум қилган. Улар қочоқлар муаммосини ёпишни, бекор қилиниши мумкин бўлмаган, ажралмас ҳуқуқларни бутунлай йўқ қилишни хоҳлашди. Ғоя оддий: қочқинлардан қутулиш учун уларга хизмат кўрсатувчи агентликни йўқ қилишга ҳаракат қилиш керак. Агар таълим, соғлиқни сақлаш бўлмаса, ёрдам бўлмаса, қочқинлар таслим бўлади, улар кетишади, улар ўз ерларини ва озодлик ҳамда қайтиш орзусини тарк этишади, деди Фаластин мухториятидан доимий кузатувчи Рияд Мансур йиғилишда.
АҚШ вакили Исроил қарорини қўллаб-қувватлашини билдирди ва АҚШ позициясини тушунтирди.
Биз озод этилган исроилликлар асирликда бўлган вақтида БМТ биноларида сақланганига оид хабарлардан ташвишдамиз. Бу жуда жиддий айбловларга баҳо бериш учун тўлиқ ва мустақил текширув ўтказиш ниҳоятда муҳимдир. Афсуски, бу ҲАМАСнинг БМТ биноларидан, айниқса, UNRWA биноларидан фойдалангани ҳақидаги биринчи айблов эмас. 30 январь куни Қуддусда жойлашган UNRWA идораларини ёпиш Исроилнинг суверен қарори. Қўшма Штатлар ушбу қарорнинг амалда бажарилишини қўллаб-қувватлайди, дейди АҚШ вакили Дороти Ши.
Изоҳ (0)