Germaniyada noqonuniy migrantlar oqimi sababli favqulodda holat joriy etilishi mumkin. Bu haqda Bild xabar berdi.
Tegishli taklif Xristian-demokratik va Xristian-sotsial ittifoqlari (XDS va XSS) fraksiyasi tomonidan ilgari surilgan. Partiya vakillari keyingi haftada ushbu rezolyutsiyani ovozga qo‘yishni rejalashtirmoqda. XDSdan Germaniya kansleri lavozimiga nomzod Fridrix Mers boshpana berish borasida favqulodda holat e’lon qilmoqchi.
Bunday vaziyatda, agar Yevropa choralari samara bermasa, Germaniya va uning hukumatining burchi — milliy qonunchilikni favqulodda vaziyatlar bo‘yicha Yevropa kelishuvlarida ko‘zda tutilgandek ustuvor tartibda qo‘llashdan iborat, deyiladi rezolyutsiya loyihasida.
Rezolyutsiya Germaniya chegaralarida uzoq muddatli nazoratni, mamlakatda qolish uchun ruxsatnomaga ega bo‘lmagan chet elliklar kirishini rad etishni nazarda tutmoqda. Bundan tashqari, Germaniyani tark etishi majburiy bo‘lgan shaxslarni zudlik bilan hibsga olish taklif etilmoqda.
Bunday choralar muhojirlar tomonidan zo‘ravonlik holatlari ko‘paygani bilan bog‘liq. Misol tariqasida, yaqinda Germaniyaning Ashaffenburg shahrida afg‘onistonlikning yo‘lovchilarga hujumini keltirish mumkin. Hujum oqibatida ikki kishi, jumladan, ikki yoshli bola halok bo‘lgan.
Gumon qilinayotgan shaxs — 28 yoshli afg‘onistonlik bo‘lib, unda ilgari ruhiy kasallik alomatlari kuzatilgan. Hibsga olingan shaxs boshpana izlovchilar markazida istiqomat qiladi. Erkakka avvalroq mamlakatni tark etish majburiyati yuklangan.
Izoh (0)