Mashhurlar hayoti nafaqat hashamatli turmush tarzi, balki ba’zida kutilmagan va aql bovar qilmaydigan odatlari bilan ham omma e’tiborida bo‘ladi. Ulardan ayrimlari oddiy kundalik ishlarni bajarishda ham boshqalarga tayanadi — kimdir yordamchisini yarim tunda uyg‘otib, film diskini almashtirishni so‘rasa, yana kimdir oddiy pitssa buyurtmasini ham mustaqil ravishda bera olmaydi. Quyida mashhurlarning eng g‘alati va kulgili holatlari haqida so‘z boradi.
Ledi Gaga
2013-yilda qo‘shiqchining do‘sti, keyinchalik uning yordamchisiga aylangan Jennifer ismli ayol, gastrol safari davomida unga mehmonxonada alohida xona ajratilmaganini da’vo qilgan. U Ledi Gaganing xonasida tunashi kerak bo‘lgan va ba’zan hatto bir to‘shakda uxlashlariga to‘g‘ri kelgan. Qo‘shiqchi buni yordamchisi tun yarmida biror narsa kerak bo‘lib qolsa, darhol yonida bo‘lishi uchun deb tushuntirgan. Bundan tashqari, Jenniferning aytishicha, agar Ledi Gaga yarim tunda tomosha qilayotgan filmidan zeriksa, uni uyg‘otib, DVD diskni almashtirishni buyurardi.
Kardashyan oilasi
2024-yilda Kardashian-Jenner oilasining ko‘p yillik shaxsiy oshpazi Kristianna Uy shunday dedi: ba’zan u 21 soatlik smenadan so‘ng uyga ketishdan oldin, ular undan yana grilda pishloq va qandaydir yengil taom tayyorlashni so‘rashadi. Kendall Jenner bodringni to‘g‘ri to‘g‘ray olmaganini ko‘rib, bu mashhur oilaning oddiy sendvich tayyorlash uchun ham professional oshpazga tayanishini endi bemalol tushunsa bo‘ladi.
Jek Harlou
2022-yilda TikTok’da reper Jek Harlou ishtirokidagi video mashhur bo‘lib ketdi. Kentukki Derbisi tadbirida u poyabzalini iflos qilishni xohlamagani uchun o‘zining shaxsiy qo‘riqchilaridan qo‘llarida ko‘tarib olib borishlarini so‘ragan.
Kendall Jenner va Heyli Biber
2022-yilda Kendall Jenner va Heyli Biber studiyaga kelganlarida nogironlar uchun mo‘ljallangan joylarga noqonuniy ravishda mashina qo‘yishayotgani payqab qolingan. Gap shundaki, ushbu joylar studiya eshiklariga eng yaqin joylashgan edi. Ma’lum qilinishicha, aksariyat hollarda ularning qo‘riqchilari mashinalarni ular ichkariga kirgach, boshqa joyga olib o‘tishgan va mashg‘ulot tugashidan oldin yana o‘sha joyga qaytarib qo‘yishgan. Bu holat bir necha hafta davom etgan.
Sher
Bir kuni Sher aktrisa Keti Griffin bilan birga dam olayotganida, Keti och qolib, qo‘shiqchiga pitssa buyurtma qilishni taklif qilgan. Sher hazil tariqasida javob bergan: “Pitssa buyurtma qilish degani nima? Men Sherman. Men bu pitssani qanday buyurtma berishni bilmayman” Eng qizig‘i shundaki, Keti ham bu ishni qanday qilishni bilmas ekan. Umid qilamizki, o‘sha kechasi ular baribir och qolmagan.
Sofiya Umanski
“Beverli-Xillzdan bo‘lgan haqiqiy uy bekalari” serialining bir epizodida aktrisa Kayl Richardsning qizi Sofiya Umanski kollejga kirganida hojatxonasini o‘zi yuvish kerakligi haqidagi fikrdan butunlay hayratda qoladi. Qiz buning uchun faqat suv tortishning o‘zi kifoya deb o‘ylagan.”
Kardi Bi
Bir paytlar qo‘shiqchi Kardi Bining avtoulovlar kolleksiyasi qiymati bir million dollardan oshiq bo‘lgan. Eng qizig‘i — Kardi haydovchilikni umuman bilmaydi. Undan “Nega bunchalik ko‘p hashamatli mashinalar kerak?”, deb so‘rashganida, “Suratga tushish uchun”, deb javob bergan.
Deniel Dey-Lyuis
Xabarlarga ko‘ra, “Mening chap oyog‘im” filmida miya falaji bilan og‘rigan qahramon rolini ijro etgan aktyor Day-Lyuis suratga olish jarayonida guruh a’zolaridan o‘zini qoshiqda ovqatlantirishni va nogironlar aravachasida olib yurishni talab qilgan. Uning rolga bunchalik kirib borishi, qoyilmaqom, biroq aktyorning hamkasblariga oson bo‘lmagan.
Jeff Bezos
Har yili milliarder bir vaqtning o‘zida to‘rtta ko‘chmas mulkka ega bo‘lgan Sietl tumanida tozalash kuni - shanbalik o‘tkaziladi. Bu tadbirda qo‘shnilar ko‘chalardan axlatlarni yig‘ish va daraxt ekish uchun birgalikda to‘planishadi. Bu nufuzli tumanda boylar ko‘p, qo‘shnilarning aytishicha, ular bir safar milliarderlardan birini tozalash paytida ko‘rishgan, ammo... bu Bezos emas edi. Amazon asoschisi mahalliy hamjamiyatning barcha tadbirlarini e’tiborsiz qoldiradi va hech qachon tuman aholisi qo‘llab-quvvatlaydigan mahalliy xayriya tashkilotiga ehson qilmagan.
Sondos al-Kattan
2018-yilda Kuvaytdan bo‘lgan go‘zallik bo‘yicha bloger Sondos al-Kattan mamlakatida uy xizmatchilarining huquqlarini himoya qilishga qaratilgan yangi qonunlardan shikoyat qilgani uchun keskin tanqidga uchradi.
U quyidagicha noligan edi:
“Endi biz qandaydir g‘alati mehnat shartnomalarini imzolashimiz kerak. Uyda xizmatkor bo‘lsa-yu, u o‘z pasportini o‘zida saqlasa, bu nimasi? Agar u qochib ketib, o‘z mamlakatiga qaytsa, pulimni kim qaytaradi? Eng yomoni — ularga har hafta bir kun dam olish huquqi berildi. Ochig‘i, bu yangi shartlar bilan men filippinlik xizmatkorni ishga olmayman. U faqat haftasiga olti kun ishlaydi va oyiga to‘rt kun dam oladi”.
Ha, u rostdan ham xizmatkorning pasporti ish beruvchida bo‘lishi kerak deb hisoblagan. Oradan ko‘p o‘tmay, u bu postni o‘chirib tashladi.
Bono
2003-yilda U2 guruhi vokalisti Bono Londondan Modenaga xayriya konsertiga ketayotib, sevimli shlyapasini unutib qoldirgan. Ammo sarosimaga tushmagan — u aksessuarni yetkazib berishni uyushtirgan va bu uchun taxminan 1 500 dollar sarflagan.
Izoh (0)