Rossiya 2026-yilgacha Ukrainaning to‘rtta viloyatini bosib olishni va keyin Yevropa sari qadam tashlashni rejalashtirmoqda. Bu haqda Welt xabar berdi.
Xabarga ko‘ra, Donetsk, Lugansk, Xerson va Zaporojye viloyatlarini to‘liq bosib olish maqsad qilingan.
AQSHning saylangan prezidenti Donald Tramp Moskvani hozir to‘xtashga majbur qilsa ham, Rossiya yaqin yillarda Yevropa uchun katta xavf tug‘dirishi mumkin, deyiladi xabarda.
Germaniya Mudofaa vazirligi huzuridagi Ukraina vaziyat markazi rahbari general-mayor Kristian Froydga ko‘ra, Rossiya Ukrainadagi qo‘shinlariga ehtiyojiga nisbatan ortiqcha qurollanmoqda. Rossiya armiyasida tanklar, o‘q-dorilar, raketalar va dronlar soni ko‘paymoqda.
Bu Kremlning NATO bilan urushga tayyorgarlik ko‘rish niyatidan dalolat beradi, garchi hozirda Rossiya G‘arb bilan to‘g‘ridan-to‘g‘ri to‘qnashuvni rejalashtirmayotgan bo‘lsa-da, deydi Frod.
Nemis harbiylari ma’lumotlariga ko‘ra, Rossiya armiyasi Ukrainadagi inson va moddiy yo‘qotishlarni sezilarli darajada qoplamoqda. Moskva har oyda 30 mingga yaqin askar yollayotgani va yangi yollanganlarni yuqori moddiy rag‘batlantirish orqali o‘ziga jalb qilayotgani aytilmoqda.
Bundan tashqari, Rossiya aviabombalar, jumladan boshqariladigan raketalar, artilleriya snaradlari, shuningdek, turli xil kamikadze dronlarini keng miqyosda ishlab chiqarishni yo‘lga qo‘ygan. Jumladan, yiliga minglab “Shahed” dronlarini ishlab chiqarmoqda.
Rossiya sezilarli miqdordagi qo‘shinlarga va keng ko‘lamli qudratli texnikaga ega, deydi Yevropa parlamenti Xavfsizlik va mudofaa masalalari qo‘mitasi raisi Mari Agnes Shtrak-Simmermann.
Uning so‘zlariga ko‘ra, Ukrainadagi urush Rossiyaning zaif tomonlarini, xususan, moddiy-texnik ta’minot, eskirgan qurol-aslahalar va askarlarning past ruhiy holatini ham oshkor qildi.
Harbiy tahlilchi Niko Lange potensial xavfni baholashda faqat askarlar yoki tanklar soniga e’tibor bermaslikka chaqirdi.
Rossiya qo‘pol harbiy kuch ishlatishga intiladi va katta yo‘qotishlarga tayyordir. Bu Rossiyani nihoyatda xavfli qiladi, deydi Lange.
U Rossiyaning Polsha va Boltiqbo‘yi mamlakatlariga qarshi to‘g‘ridan-to‘g‘ri hamda gibrid hujumlari ehtimoli haqida ogohlantiradi. Shtrak-Simmerman bunday ssenariylarning ehtimolligi ko‘p jihatdan Ukrainadagi urush natijalariga bog‘liqligini aytdi.
“Putin aytish mumkinki, qon ta’mini totib ko‘rdi. Agar siz tinchlikni saqlamoqchi bo‘lsangiz, o‘zingizni himoya qila olishingiz kerak. Agar biz buni tushunib yetmasak va Putin Ukrainada muvaffaqiyatga erishsa, to‘rt-besh yildan so‘ng NATO a’zosiga hujum qilish ehtimoli haqiqatga juda yaqin bo‘ladi”, dedi u.
Izoh (0)