Amerikalik qo‘shiqchi Jennifer Lopesning Yerevanda bo‘lib o‘tgan konsertidan so‘ng Armaniston futbol jamoatchiligi “Respublika” stadionidagi maydon holatidan jiddiy xavotirga tushmoqda.
Sputnik Armaniston nashrining yozishicha, stadiondagi gazon holati “yomon” emas, balki “juda yomon” darajada. Maydonni tiklash uchun katta hajmdagi ishlarni amalga oshirish talab etiladi. Hozirgi holatda bu stadionda futbol o‘yinlarini o‘tkazish deyarli imkonsiz.
Bu holat ayniqsa, Armanistonning amaldagi chempioni — “Noa” jamoasining Yevropa Ligasi pley-off bosqichi yo‘llanmasini qo‘lga kiritishi mumkinligi fonida ko‘pchilikda xavotir uyg‘otmoqda. Agar jamoa keyingi bosqichga yo‘l olsa, 21-avgust kuni aynan “Respublika” stadionida o‘z uy o‘yinini o‘tkazishi kerak. Ammo ma’lumotlarga ko‘ra, shu muddatgacha gazonni talab darajasiga keltirish deyarli imkonsiz.
Stadion direktori Ashot Barsegyan Sputnik Armanistonga bergan intervyusida gazon tiklash ishlari boshlanganini aytdi. Uning so‘zlariga ko‘ra, konsertdan so‘ng gazon faqat biroz sarg‘aygan, xolos: “Uni faqat sug‘orib, tekislash kifoya. Boshqa muammo yo‘q”, — dedi u.
Biroq stadiondagi holatga guvoh bo‘lgan boshqa manbalar bu fikrga qo‘shilmayapti. Ularning aytishicha, birgina sug‘orish bilan muammoni bartaraf etishning iloji yo‘q.
Ma’lumot uchun, Jennifer Lopes 7-avgust, payshanba kuni Toshkentdagi “Bunyodkor” stadionida ham konsert bergan. Hozircha ushbu stadionning gazon holati haqida rasmiy ma’lumot mavjud emas.
Izoh (0)