Germaniyada afg‘onistonlik erkak odamlarga pichoq bilan hujum qildi: qurbonlar bor

Bavariyada bir erkak odamlarga pichoq bilan hujum qilishi oqibatida ikki kishi, jumladan ikki yoshli bola halok bo‘ldi.

Voqea Germaniyaning Ashaffenburg shahrida, shahar markazidagi Shyontal bog‘ida sodir bo‘ldi. Dastlabki ma’lumotlarga ko‘ra, bir necha kishi, shu jumladan bolalar bog‘chasidan kelgan bir guruh bolalar uchli quroldan jarohat olgan. Huquq-tartibot idoralari hujum natijasida ikki kishi halok bo‘lganini ma’lum qildi.

Bild ma’lumotlariga ko‘ra, qurbonlar 41 yoshli erkak va 2 yoshli o‘g‘il bola bo‘lgan. Bundan tashqari, politsiya xabarida ikki nafar og‘ir yarador shifoxonaga joylashtirilgani aytilgan. Og‘ir tan jarohati olganlar orasida yana bir bola ham bo‘lishi mumkin.

Tergov ma’lumotlariga ko‘ra, bir erkak qo‘lga olingan. Gumon qilinayotgan shaxs — 28 yoshli afg‘onistonlik bo‘lib, Bild ma’lumotlariga ko‘ra, unda ilgari ruhiy kasallik alomatlari kuzatilgan. Spiegel ma’lumotlariga ko‘ra, hibsga olingan shaxsning ismi Enamullo O. bo‘lib, u boshpana izlovchilar markazida istiqomat qiladi. Erkakka avvalroq mamlakatni tark etish majburiyati yuklangan. Bu haqda rasmiylar matbuot anjumanida xabar berildi.

Afg‘onistonlik erkak Germaniyaga 2022-yil noyabr oyida kelgan, ammo unga boshpana berilmagan. O‘tgan yil oxirida u ixtiyoriy ravishda ketishini e’lon qilgan. Shundan so‘ng, uning boshpana so‘rovi bekor qilingan, biroq afg‘onistonlik mamlakatda qolgan.

Hodisa sabablari hozircha noma’lumligicha qolmoqda. Politsiya ma’lumotlariga ko‘ra, gumonlanuvchi temir yo‘l bo‘ylab qochib, yashirinishga uringani sababli poyezdlar harakati vaqtincha to‘xtatilgan. To‘qqiz gektarlik Shyontal bog‘i qurshab olingan.