Migratsiya agentligi O‘zbekistondagi og‘ir yuk mashina haydovchilari Germaniyaga ishga taklif qilinayotganini ma’lum qildi.
Qayd etilishicha, Migratsiya agentligi, Germaniyaning SBH West GmbH (Stiftung Bildung & Handwerk) hamda “Vatanparvar” tashkilotlari o‘rtasida uch tomonlama hamkorlik memorandumi imzolandi. Ikki davlat migratsiya sohasida ilk bor amaliyotga tadbiq etilayotgan bu kelishuv natijasida 700 nafar o‘zbekistonlik yuk mashinalari, avtobus va lokomotiv haydovchisi sifatida O‘zbekiston hududida nemis tiliga o‘qitilib, “Vatanparvar” tashkilotida kasbiy qayta tayyorlov kurslarida malaka oshiradi va Germaniyaga to‘g‘ridan to‘g‘ri ishga yuboriladi.
Oylik maosh 2400—2600 yevroni tashkil qiladi.
“Hozirda Germaniyada 80 mingga yaqin og‘ir yuk haydovchilariga talab bor. Bu borada o‘zbekistonlik ishchilarning til o‘rganish borasidagi salohiyati va kasbiy o‘zlashtirish qobiliyati Germaniya ish beruvchilari tomonidan alohida e’tiborga olinmoqda”, deydi SBH West GmbH direktori Peter Niemann.
Uning bildirishicha, imzolangan uch tomonlama hamkorlik memorandumi doirasida viza jarayonlaridan kelib chiqib yiliga 500 nafar ishchini til va malaka kurslarida tayyorlab, to‘g‘ridan to‘g‘ri ish bilan ta’minlash rejalashtirilgan.
Hozirgi kunda bir guruh tinglovchi onlayn darslarda ishtirok etmoqda, yaqin kunlarda yangi guruhlar ochiladi va keng miqyosli o‘qishlar boshlanadi. Murojaat uchun Migratsiya agentligining quyidagi raqamlariga bog‘lanish mumkin: 1282, 71 202-33-55 (10/17).
2025-yil 17-yanvar kuni O‘zbekiston tashqi ishlar vaziri o‘rinbosari Olimjon Abdullayev Germaniyaning SBH West GmbH tashkiloti vakillari bilan uchrashuv o‘tkazib, O‘zbekiston va Germaniya o‘rtasida kasb-hunar ta’limi va chet elda fuqarolarni ish bilan ta’minlash sohasidagi hamkorlikni mustahkamlashga qaratilgan asosiy masalalarni muhokama qilgan.
Unda O‘zbekiston fuqarolarini Germaniyada yuk va avtobus haydovchisi sifatida ishga joylashtirishga ko‘maklashishga qaratilgan uch tomonlama memorandumni amalga oshirishga alohida e’tibor qaratilgan.
Shuningdek, tomonlar O‘zbekiston hududlarida SBH West GmbH o‘quv markazlarining filiallarini tashkil etishga kelishib oldi. Ushbu ta’lim muassasalari Germaniya mehnat bozori talablariga moslashtirilgan kasbiy ta’lim dasturlarini taklif etadi. Bunday markazlarning bitiruvchilari Germaniyada muvaffaqiyatli ishga joylashish uchun zarur ko‘nikma va malakalarga ega bo‘ladi.
Erishilgan kelishuvlarning amalga oshirilishi O‘zbekiston fuqarolari uchun xalqaro mehnat bozorlarida yangi ish o‘rinlari yaratish imkonini beradi hamda O‘zbekiston va Germaniya o‘rtasida ta’lim, migratsiya va malaka oshirish sohasidagi ikki tomonlama hamkorlikni mustahkamlashda muhim qadam bo‘ladi.
Germaniyada yuk avtomobili haydovchisi yetishmayotgani haqida avval ham xabar berilgandi. Papenburg logistika kompaniyasi ham O‘zbekistondan haydovchilarni ishga jalb qilmoqchi. Ularni o‘qitishga ham tayyor. Ushbu kompaniyada ishlayotgan o‘zbekistonlik yigitlardan biri amaliyot davrida oyiga 800 yevro ishlab topgan.
Izoh (0)