Sobiq deputat, ijtimoiy tarmoq faoli Qobil Dusov qamoqqa olingan. Bu haqda O‘zbekiston inson huquqlari “Ezgulik” jamiyati raisi Abdurahmon Tashanov maʼlum qildi.
Kecha oqshomda (24-yanvar nazarda tutilmoqda) O‘zbekiston Respublikasi Ichki ishlar vazirligi jamoat faoli Qobil Dusovni hibsga olibdi. Menga Qobil bilan birga vazirlikka olib kelingan, so‘ng qo‘yib yuborilgan sherigi qo‘ng‘iroq qildi, deb yozadi “Ezgulik” jamiyati raisi Facebookdagi sahifasida.
Tashanovning rasmiylarga tayanishicha, Dusov probatsiya qoidalarini buzgani uchun “ichkari”ga olingan.
Ichki ishlar vazirligi Dusovning qamoqqa olinganini tasdiqladi
“Daryo” Qobil Dusovning Samarqandda Ichki ishlar vazirligi tomonidan qo‘lga olinganiga aniqlik kiritish maqsadida vazirlik axborot xizmati rahbari Shohrux G‘iyosov bilan bog‘landi. Masʼul tahririyatning bu haqdagi savoliga javob berar ekan, “Qonunchilikda belgilangan chora ko‘rilishi taʼminlangan”, dedi.
Shohrux G‘iyosovning gapidan anglashiladiki, Qobil Dusov Abdurahmon Tashanov yozganidek, qamoqqa olingan.
Dusovga nega ozodlikni cheklash jazosi tayinlangan edi?
2024-yilning 22-noyabr kuni Jinoyat ishlari bo‘yicha Chilonzor tuman sudi Maktabgacha va maktab taʼlimi vaziri o‘rinbosari Farhod Boqiyevning Qobil Dusovdan jabrlanganini aytib, sudga bergan shikoyatini ko‘rib chiqqandi.
Sud jarayonlari haqida maʼlumot bergan Oliy sud Jinoyat ishlari bo‘yicha Chilonzor tuman sudi Dusovning jinoyat sodir etishdagi aybini jabrlanuvchining ko‘rsatmasidan tashqari, jinoyat ishida to‘plangan dalillar bilan isbotlaganini maʼlum qilgandi.
Jabrlanuvchilarning arizasi, tushuntirish xatlari, guvohlarning ko‘rsatmalari, sudga doir lingvistik ekspertizalar xulosalari, yozuvlar skrinshoti, Facebook ijtimoiy tarmog‘idagi “Kabul Dusov” nomli profilni va Telegram messenjeridagi “Kobul Dusov | Rasmiy kanal” nomli kanalni ko‘zdan kechirish bayonnomasi, sudga doir kompleks ekspertizalar xulosalari hamda jinoyat ishi bo‘yicha barcha to‘plangan, tekshirilgan, ishga aloqadorligi, maqbulligi va ishonchliligi nuqtayi nazaridan baholangan dalillar bilan to‘liq isbotlangan deb hisobladi, deyilgandi Oliy sudning bu haqdagi bayonnomasida.
Probatsiya qoidalari va unga amal qilmaslik qanday oqibatga olib keladi?
Sud hukmiga muvofiq Qobil Dusov vazir o‘rinbosarini haqorat qilishda aybli deb topilib, bir yil muddatga ozodlikni cheklash bilan jazolangan edi.
Jinoyat kodeksining 48-1-moddasiga (ozodlikni cheklash) asosan Dusovga sutkaning muayyan vaqti, yaʼni kech soat 21:00 dan ertalabki soat 07:00 ga qadar yashash joyidan chiqish cheklangandi.
Bundan tashqari, ayblanuvchiga har oyda bir marotaba yashash joyi bo‘yicha IIO FMB Probatsiya bo‘limidan ro‘yxatdan o‘tib turish hamda mahkumlarni nazorat qiluvchi organning roziligisiz yashash joyini o‘zgartirmaslik kabi taqiqlar yuklangandi.
Aynan shu talablar probatsiya talablari hisoblanadi. Bu talablarni buzgan mahkumga nisbatan Jinoyat kodeksining 48-1-moddasiga (ozodlikni cheklash) asosan ozodlikni cheklash jazosining o‘talmay qolgan muddati boshqa turdagi jazo bilan almashtirishi mumkin. Jazoni o‘tashdan bo‘yin tovlash vaqti o‘talgan jazo muddatiga qo‘shib hisoblanmaydi.
Izoh (0)