Ayni kunlarda ijtimoiy tarmoqlarda “Mening yurtim” telekanali muxbiri Ruxsora G‘ofurovaning Jizzaxdagi tegishli bankda bank xodimasi fuqarolar nomiga kredit rasmiylashtirib, o‘zlashtirganlik bilan bog‘liq materiali jamoatchilikning qizg‘in bahs-munozaralariga sabab bo‘lmoqda.
Jurnalistlar uyushmasi mas’ullari ayni masalaga oydinlik kiritish maqsadida “Mening yurtim” telekanali muxbiri Ruxsora G‘ofurova bilan muloqotda bo‘ldi.
Uning ma’lum qilishicha, telekanalga 2024-yilning dekabr oyida fuqarolar Oybek Ochilov, Zebo Boynazarova va uning turmush o‘rtog‘i Jamoliddin Boynazarovlar tomonidan yozilgan murojaat xati kelgan. Demak, ayni xat asosida “Mening yurtim” telekanali jurnalisti material tayyorlagan.
Ushbu material-lavha efirga uzatilgach, bank xodimasi murojaatiga ko'ra, poytaxtimizdagi tegishli ichki ishlar bo‘limi R. G‘ofurovadan faqatgina ayni holat yuzasidan tushuntirish xati olgan xolos. Buni R. G‘ofurovaning advokati Amrullo Ahmedov uyushmaga ma’lum qildi.
Advokatning aytishicha, 2025-yil bugun, 24-yanvar kungi holatda R. G‘ofurovaga nisbatan ma’muriy bayonnoma tuzilmagan. Demak, R. G‘ofurovaga nisbatan ma’muriy ish qo‘zg‘atilgan qabilida ijtimoiy tarmoqlarda tarqalgan xabarlar asossiz, deyiladi uyushma xabarida.
Mazkur holatni o‘rganish jarayonlarida fuqarolar nomiga kredit rasmiylashtirib, o‘zlashtirganligi aytilayotgan bank xodimasining turmush o‘rtog‘i sudya ekani ham ma’lum qilingan.
O‘zbekiston Jurnalistlar uyushmasi O‘zbekiston Respublikasining jinoyat-protsessual kodeksining 322-moddasi 3-bandida ommaviy axborot vositalari bergan xabarlar jinoyat ishi qo‘zg‘atishga sabablar va asoslar qatorida qayd etilganini eslatadi. Yuqoridagi holat bo‘yicha tegishli organlardan qonunchilikda belgilangan talablarga muvofiq huquqiy baho berilishini so‘raydi.
Uyushma “Mening yurtim” telekanali muxbiri Ruxsora G‘ofurova bilan bog‘liq holat bo‘yicha adolatli qaror qabul qilinishi ta’minlanishiga har jihatdan ko‘maklashadi. Holat bilan bog‘liq jarayonlarni kuzatadi, ushbu masala bo‘yicha qo‘shimcha axborot berib borilishini ma’lum qiladi, deyiladi uyushma xabarida.
Avvalroq inson huquqlari faoli Abdurahmon Tashanov “MY5” kanali muxbiri Ruxsora G‘ofurova Jizzaxdagi bank xodimasin fuqarolar nomiga kredit rasmiylashtirib, o‘zlashtirgani haqida material tayorlagani, material efirga uzatilgach, bank xodimasining arizasiga ko‘ra Ruxsora G‘ofurovaning o‘ziga nisbatan maʼmuriy ish qo‘zg‘atilgani haqida xabar qilgandi.
Bank xodimasining o‘zga shaxslar nomiga olingan kreditining bir qismini uning eri - Oliy sud sudyasi Sharofiddin Boliyev o‘z plastik kartasi orqali to‘lab kelgan. Sudya bu qonunbuzarlikdan xabardor bo‘lgan va qonunbuzar ayolini himoya qilgan. Katta ehtimol bilan jurnalistga hujum ortida ham janobning o‘zlari turibdi, deb yozgan Tashanov.
Izoh (0)