Taniqli aktyor, O‘zbekiston Kinoarboblari ijodiy uyushmasi raisi Matyoqub Matchonov Kinematografiya agentligi binosida fuqaroni haqorat qilgani uchun jarimaga tortildi.
Hujjatga ko‘ra, Matyoqub Matchonov 2025-yil 15-yanvar kuni Kinematografiya agentligi binosida bo‘la turib, tanishi E.Yo‘ldoshevni o‘tkazilayotgan tadbirga xalaqit berishi vaji bilan binoga kiritmasligi yuzasidan kelishmovchilik kelib chiqqan. Natijada aktyor E.Yo‘ldoshevni turli so‘zlar bilan haqorat qilib, uning sha’ni va qadr-qimmatini qasddan kamsitgan.
Huquqbuzar Matyoqub Matchonov sud majlisida E.Yo‘ldoshevni ancha yillardan buyon tanishi va uning arizasiga asosan, Kinematografiya agentligida tekshirish ishlari olib borilayotganini ma’lum qilgan. E.Yo‘ldoshev o‘z arizasida Matchonovni Badiiy kengash a’zosi sifatida davlat buyurtmasi asosida tasvirga olingan kinolarda rol ijro etgani va bu manfaatlar to‘qnashuvi ekanini ko‘rsatib o‘tgan.
Matyoqub Matchonovning so‘zlariga ko‘ra, 15-yanvar kuni E.Yo‘ldoshev Kinematografiya agentligiga kelganida, qorovullar uni ichkariga kiritmagan va o‘rtada tortishuv yuz bergan. Bu vaziyatni ko‘rgan Matyoqub Matchonov u bilan arizasida ko‘rsatilgan holatlar bo‘yicha gaplashib olmoqchi bo‘lgan, E.Yo‘ldoshevni ancha yillardan beri tanigani sababli unga gapirgan. O‘sha kuni agentlik pavilyonida taniqli bir operatorning ijodiga bag‘ishlangan tadbirga tayyorgarlik ko‘rilayotganini aytib, ichkariga kirib ketgan. O‘sha kuni tushdan so‘ng E.Yo‘ldoshev yana agentlikka kelib, qorovullar bilan tortishgan. Matyoqub Matchonov tadbirga halal bermasligi uchun unga bu yerdan chiqib ketishini aytib, jahl ustida E.Yo‘ldoshevni haqorat qilgan.
Sudda Matyoqub Matchonov mazkur holat bo‘yicha undan kechirim so‘rashi, vaziyat bunchalik bo‘lib ketishini bilmagani aytgan. U E.Yo‘ldoshevni ukasidek ko‘rib, unga hazil qilgan paytlari bo‘lgani, uning ariza yozishi xayoliga ham kelmagani, shu sababli jahli chiqqanini aytib, suddan yengillik berishni so‘rab ko‘rsatma bergan.
Sud majlisida so‘ralgan jabrlanuvchi E.Yo‘ldoshev Kinematografiya agentligining moliyaviy faoliyatidagi kamchiliklarni o‘rganish maqsadida Bosh prokuraturaga ariza bilan murojaat qilgani, o‘rganish shaffof bo‘lishi uchun u ham agentlikka kelgani, lekin agentlik rahbari uni binoga kiritmaslikka harakat qilganini aytgan.
Uning qo‘shimcha qilishicha, 15-yanvar kuni qorovullar uni ichkariga kiritmagan, shu payt Matyoqub Matchonov ko‘rib qolib, arizasi yuzasidan so‘ragan va uni haqorat qilgan. E.Yo‘ldoshev ushbu suhbatni telefon apparatida diktofonga yozib olgan va IIBga xabar bergan.
22-yanvar kuni Toshkent shahar jinoyat ishlari bo‘yicha Chilonzor tuman sudi qarori bilan Matyoqub Matchonov Ma’muriy javobgarlik to‘g‘risidagi kodeksning 41-moddasida (haqorat qilish) nazarda tutilgan ma’muriy huquqbuzarlikni sodir etgan deb topilgan. Unga BHMning uch baravari (1 million 125 ming so‘m) miqdorida jarima jazosi tayinlangan.
Izoh (0)