Buyuk Britaniyada uch nafar qizning o‘limiga sabab bo‘lgan 18 yoshli Aksel Rudakubana 52 yilga qamaldi. Tegishli qaror Liverpul Qirollik sudi tomonidan qabul qilindi.
O‘smir 2024-yilning yozida Sautport shahridagi bolalar raqs klubiga hujum qilgandi. Oqibatda uch nafar qiz halok bo‘lgan. 20-yanvar kuni sudya Rudakubanaga umrbod qamoq jazosiga teng hukm berdi. O‘smir jinoyat sodir etgan payt 18 yoshda bo‘lmagani tufayli umrbodga qamalmadi.
Qizlarni o‘ldirishdan tashqari, u yana 13 ta jinoyatda, jumladan, sakkiz nafar bola va ikki nafar kattalar hayotiga suiqasd qilishda aybdor deb topilgan. Rudakubana “Al-Qoida” o‘quv qo‘llanmasining nusxasini saqlash va ritsin zaharini tayyorlash bo‘yicha aybini ham tan olgan.
Hukm o‘qib eshittirilayotgan paytda mahkum majlislar zalida bo‘lmagan. U o‘zini yomon his qilayotgani haqida baqirib, jarayonni izdan chiqarishga uringan va shu sababli xonadan chiqarib yuborilgan. Biroq uni tekshirgan shifokorlar mahkumning sog‘lig‘i yomonlashganini tasdiqlamagan.
Qurbonlar olti, yetti va to‘qqiz yoshli qizlar...
Rudakubana 2024-yil 29-iyul kuni Hope of Hart bolalar raqs klubiga pichoq bilan bostirib kirdi. Hujum oqibatida 7 yoshli Elsi Dot Stankomb, 9 yoshli Alisa Dasileva Agiar va 6 yoshli Bibi King halok bo‘ldi. Yana bir necha bola pichoq bilan jarohatlangan. Politsiyaning fikricha, Rudakubana hujum paytida “Al-Qoida” qo‘llanmasidan pichoq sanchish usullarini o‘rgangan.
“Men bolalar o‘lganidan juda xursandman. Bu meni baxtli qiladi”, degan Rudakbana politsiya bo‘limida.
Hujumdan so‘ng Britaniyaning bir qancha shaharlarida — London, Bristol, Belfast, Sautport, Halle, Liverpul, Manchesterda tartibsizliklar va muhojirlarga qarshi noroziliklar boshlangan. Namoyishchilar muhojirlar va politsiya bilan to‘qnashgan, politsiya uchastkalari, do‘konlar va masjidlarni vayron qilgan.
Tartibsizliklar Channel3 Now sayti tomonidan boshlangan dezinformatsiya to‘lqini tufayli yuzaga kelgan. AQSH axborot agentligi niqobi ostidagi ushbu manba klubga hujumni “17 yoshli musulmon, Ali Al-Shokatiy ismli qochoq” amalga oshirgani haqida feyk xabar e’lon qilgan. Keyinchalik sud uning shaxsini oshkor qilishga ruxsat bergan. U Kardiffda 2006-yilda tug‘ilgan, kelib chiqishi ruandalik ekani aniqlangan. Rudakbana butun umri davomida Buyuk Britaniyada yashab kelgan.
Izoh (0)