Ijtimoiy tarmoqlarda buxorolik ayol farzandini dunyoga keltirish vaqtida vafot etgani haqida xabarlar tarqaldi. Holat yuzasidan Buxoro viloyati Sog‘liqni saqlash boshqarmasi izoh berdi.
Maʼlum qilinishicha, marhuma O.Z. 1992-yilda Qorako‘l tumanida tug‘ilgan. 2024-yilning 12-dekabr kuni, soat 21:50 da RIO va BSIATM DM Buxoro filiali (perinatal markaz)ga qabul qilingan. O‘sha vaqtda kuchli shamollash alomatlari — yo‘tal, tana haroratining 38 darajagacha ko‘tarilishi, suv ketishi, umumiy holsizlik holatida bo‘lgan.
Qayd etilishcha, bemorda homiladorlik kamqonlik fonida kechgan. Homiladorlikning 14 haftalik muddatida jigar exinokoki tashxisi bilan operativ davolangan.
Buxoro viloyati SSBga ko‘ra, kerakli barcha klinik laborator, instrumental tekshiruvlar o‘tkazilgan. Kerakli mutaxassislar (pulmonolog, terapevt) konsultatsiyasi o‘tkazilgan.
Qo‘shimcha qilinishicha, konsilium asosida standartlarga ko‘ra kerakli davo buyurilgan, kuzatuv davom ettirilgan. Ayolda tug‘uruq Milliy standart asosida olib borilgan, operativ tug‘uruqqa ko‘rsatma bo‘lmagan.
13-dekabr soat 7:00 da tana haroratining 38 darajagacha ko‘tarilishi kuzatilgan. “Paratsetamol” tabletkasi berilgan. Kelishilgan shifokorlar konsiliumidan keyin tor mutaxassislar pulmonolog va jarroh ko‘ruvi tashkil qilingan. Shu kuni soat 12:30 da muntazam tug‘uruq dardlari boshlangan.
Soat 14:25 da jadallashgan tug‘uruq sodir bo‘lgan. Chaqaloq qiz jinsli vazni 4,1 kg, bo‘yi 53 sm,
“Apgar shkalasi bo‘yicha 7-8 ballda tug‘ilgan. Tug‘uruqning 3-davrini aktiv olib borish maqsadida “Oksitotsin 10 YED m/g” qilingan. 3 daqiqadan so‘ng platsenta to‘liq ajralib chiqqandan so‘ng, bir vaqtda 250 ml qon ketgan, bachadon gipotoniyasi kuzatilgan”, deya qo‘shimcha qilinadi xabarda.
Shundan so‘ng ayolning ahvoli birdan yomonlashib, nafas yetishmovchiligi belgilari kuzatilgan. Zudlik bilan reanimatologlar va kerakli mutaxassislar chaqirilgan.
Bemor ko‘rsatma asosida sunʼiy nafas apparatiga ulangan va intensiv reanimatsion chora-tadbirlar boshlangan. Bemorda yurak fibrilyatsiyasi aniqlangan. Yurak faoliyatini tiklash va fibrilyatsiyaning oldini olish maqsadida “Adrenalin”, “Atropin”, “Solumedrol”, “Norepayn”, “Dofamin” preparatlari qilingan. Puls periferiyada aniqlanmagan. Yurak faoliyatini tiklash maqsadida defibrilyatsiya va yurak bevosita massaji qilingan.
15:05 da bemorning ahvoli og‘irlashib, nafas yetishmovchiligi, teri sianozi kuchaygan. Ko‘z qorachig‘i kengaygan, yorug‘likka reaksiyasi yo‘qolgan. Afsuski, 40 minut o‘tkazilgan o‘pka-yurak reanimatsion chora-tadbirlaridan so‘ng ham yurak faoliyati tiklanmagan. Soat 15:15 da biologik o‘lim qayd qilingan.
Marhuma sud tibbiyot ekspertizasidan o‘tkazilib, o‘lim sababi sifatida qog‘onoq suvlari emboliyasi tasdiqlangan.
Holat yuzasidan Buxoro davlat tibbiyot institutining professor-mutaxassislari ishtirokida xizmat tekshiruvi o‘tkazilgan va Respublika ixtisoslashtirilgan “Ona va bola salomatligi” ilmiy-amaliy tibbiyot markazining mutaxassislari ishtirokida muhokama qilingan.
Tibbiy hujjatlar yuritilishida xato va kamchiliklarga yo‘l qo‘ygan xodimlar — markazning 2-tug‘uruq bo‘limi mudiri S.R.ga hamda davolovchi akusher-ginekolog Z.M.ga o‘rtacha oylik maoshidan 30 foiz jarima qo‘llanilib, boshqa bo‘limga rotatsiya qilingan.
Izoh (0)