AQSHning saylangan prezidenti Donald Trampga sobiq pornoaktrisa Stormi Denielsga to‘lovlar bilan bog‘liq ish bo‘yicha hukm joriy yilning 10-yanvar kuni, uning inauguratsiyasidan o‘n kun oldin e’lon qilinadi.
Nyu York shtati sudyasi Xuan Merchanning qarori shtat sud tizimining veb-saytida e’lon qilindi.
Ish bo‘yicha hukmni e’lon qilish 10-yanvar kuni ertalabga belgilangan. Sudya qaroriga ko‘ra, javobgar hukm chiqarilishida shaxsan yoki virtual tarzda ishtirok etishni tanlashi mumkin.
Hozirgi bosqichda sudning ozodlikdan mahrum qilish tariqasidagi hech qanday hukm chiqarmaslikka moyilligini e’lon qilish maqsadga muvofiq. Shartsiz ozod qilish haqidagi hukm eng hayotiy qaror hisoblanadi, deyiladi hujjatda.
Reuters’ning tushuntirishicha, bu yuridik ta’rif Trampga na qamoqqa olish, na jarima, na sinov muddati tayinlanishini anglatadi.
Avvalroq Trampning advokatlari ishni to‘xtatish haqida ariza bergan edi. Ammo sudyaning bugungi bayonotida “bunday qaror qonun ustuvorligiga putur yetkazishi” aytilgan.
Tramp sudyaning qaroriga nisbatan keskin noroziligini bildirdi. Tramp o‘ziga qarshi qo‘yilgan ayblovlarni “nafaqat da’vo muddati to‘g‘risidagi qonun bilan taqiqlangan, balki umuman qo‘zg‘atilmasligi kerak bo‘lgan uydirma ish” deb atadi.
Bu noqonuniy siyosiy hujum soxtalashtirilgan masxaradan boshqa narsa emas. Radikal partiya faoli bo‘lgan “vazifani bajaruvchi” sudya Merchan yaqinda yana bir qaror chiqardi. Bu qaror qonunga xilof, konstitutsiyamizga zid va agar unga o‘z kuchida qolishiga yo‘l qo‘yilsa, biz bilgan prezidentlik tizimining tugashini anglatadi, deb yozadi Tramp Truth Social ijtimoiy tarmog‘ida.
Trampning qo‘shimcha qilishicha, “Merchan konstitutsiyani hurmat qilmagani sababli saylangan prezidentga taalluqli ma’lumotlarni oshkor qilishga noqonuniy taqiqni saqlab qoldi”.
Men Amerika tarixida o‘zini himoya qilishga ruxsat berilmagan yagona siyosiy muxolifman. Bu Birinchi tuzatishning jirkanch buzilishidir!, deya ta’kidladi respublikachi.
Aprel oyida Donald Trampga qarshi pornoaktrisa Stormi Denielsga pul o‘tkazmalarini yashirish ishi bo‘yicha boshlangan sud AQSH tarixida sobiq prezidentga qarshi birinchi jinoiy sud sifatida e’tirof etildi. Danielsning ta’kidlashicha, u tadbirkor bilan 2006-yilda golf bo‘yicha xayriya turnirida tanishgan va u bilan yashirin jinsiy aloqada bo‘lganini qayd etgan.
Pornoaktrisa 2016-yilda Trampning saylovoldi kampaniyasi paytida fosh qilish bilan tahdid qilgan, ammo uning vakillaridan sukut saqlagani uchun pul olgan.
Trampga qarshi yana uchta tergov olib borildi, ammo faqat Danielsning to‘lovlari haqidagi ish sudga qadar yetib bordi.
Izoh (0)