Toshkent shahar IIBB ijtimoiy tarmoqlarda sobiq deputat Qobil Dusovning YPX xodimlari bilan janjallashgani aks etgan video bo‘yicha ma’lumot berdi.
Ijtimoiy tarmoqlarda tarqalgan videoda Qobil Dusov YPX xodimlarining talablariga bo‘ysunmay, janjal ko‘targani tasvirlangan.
Ma’lumotlarga ko‘ra, 26-yanvar kuni soat 23:30 da YPX inspektori serjant J.To‘raboyev Yashnobod tumanidagi Mirzo Ulug‘bek va Sultonali Mashhadiy ko‘chalari kesishmasida xizmat olib borishi davomida jezl va hushtak bilan Captiva rusumli avtomobil haydovchisiga to‘xtash haqida ishora bergan. Ammo haydovchi ichki ishlar xodimining qonuniy talabini mensimasdan harakatni davom ettirgan.
Avtomobil ko‘p o‘tmay Mirzo Ulug‘bek va Maxtumquli ko‘chalari kesishmasida to‘xtatilgan. Avtomobilni boshqarib borgan 36 yoshli Toshkent viloyatida istiqomat qiluvchi Qobil Dusov inspektorga transport vositasini boshqarish huquqini beruvchi hujjatlarni taqdim qila olmagan. Yo‘lovchi sifatida avtomobilda transport vositasi egasi — 42 yoshli Feruza B. ham bo‘lgan. Haydovchi va yo‘lovchi YHXB YPX inspektorlari bilan janjal boshlab, o‘z xizmat faoliyati va egallab turgan lavozimlaridan kelib chiqqan holda ularga nisbatan qonuniy chora ko‘rmaslikni talab qilgan.
Muloqot davomida yo‘l-patrul xizmati haydovchi spirtli ichimlik ta’siri ostida ekanligidan shubhalanib, uni ekspertizaga borishni taklif qilgan. Haydovchi avval bosh tortib, keyin tekshiruvdan o‘tishga rozi bo‘lgan. Alkotestor haydovchi tomonidan chiqarilgan nafasda 0,660 mg/l alkogol konsentratsiyasi borligini aniqlagan.
Qobil Dusovga nisbatan Ma’muriy javobgarlik to‘g‘risidagi kodeksning 131-moddasi birinchi qismi (transport vositalarini mast holda boshqarish) bo‘yicha ma’muriy bayonnoma rasmiylashtirildi. Feruza B.ga nisbatan esa Ma’muriy javobgarlik to‘g‘risidagi kodeksning 131-moddasi uchinchi qismi (alkogolli ichimlikdan, giyohvand modda ta’siridan yoki o‘zgacha tarzda mast shaxsga transport vositasini boshqarishni topshirish) bo‘yicha ma’muriy bayonnoma rasmiylashtirilgan.
Ma’lumot uchun, ijtimoiy tarmoqlardagi chiqishlari bilan ko‘pchilikka tanish sobiq deputat Qobil Dusov 2020-yilning 24-iyunida internetdagi sahifasi orqali xalq ta’lim tizimini tanqid qilgan edi. U o‘z videomurojaatida attestatsiya tizimining korrupsiyaga botganligi, maktablardagi sharoitlarning yomonligi, o‘qituvchilar oyligi pastligi hamda tizimning og‘ir ahvoli haqida gapirgandi.
Mazkur videomurojaat tufayli Xalq ta’limi vazirligi Qobil Dusov ustidan fuqarolik ishlari bo‘yicha Chirchiq tumanlararo sudiga da’vo arizasi kiritgandi. Unda Dusovning tanqidiy videomurojaati orqali vazirlikning sha’ni, qadr-qimmati va ishchanlik obro‘siga putur yetkazuvchi ma’lumotlar tarqatgani aytiladi.
Shundan so‘ng Dusov va vazirlik o‘rtasida bir necha marotaba sud majlisi bo‘lib o‘tdi. 23-sentabr kuni o‘tkazilgan sud majlisida sudya Qobil Dusovning videomurojaatida aytgan so‘zlari ustidan sud-lingvistik ekspertizasi tayinlash va uni o‘tkazishni Chirchiq davlat pedagogika instituti zimmasiga yuklash to‘g‘risida ajrim chiqardi. Noyabr o‘rtalarida yakunlangan sud jarayonlarida sud sobiq deputat Qobil Dusov Xalq ta’limi vazirligidan uzr so‘rashi kerakligi haqida qaror qabul qildi.
Izoh (0)